CULTURE – FRIÛL TAL ETERE. Balon, ce passion!

In autun, si screin i gnûfs palinsescj. Daspò de programazion balneâr dal Istât, e je ore di meti sot naftaline replichis e telefilm americans dai agns Otante. Inalore, al va dite subit che lis gnovis plui impuartantis a son sul balon. E che par altris programs, no si mostrin particolârs gambiaments. Parcè il balon? Par vie che la gnove normative – ancjemò plui restritive dal an passât – e oblee lis emitents locâls a imbastî programs dulà che, par paradòs, no si à di fevelâ di balon, ma «a la lontane», cence telecronachis des partidis dal stadi, cence colegaments cui stadis. Une decision che e à pocât autôrs e condutôrs a ritocjâ lis formulis des trasmission. In miôr o in piês, al dipent un poc dal feeling cul argoment: dal sigûr nol varà gjoldût cui che al seguìs chestis trasmissions parcè che interessâts a ce che a sucêt sul cjamp di zûc.
Di altre bande, a son oris di jemplâ cun argoments, oltri i 90 minûts regolârs. Doi esemplis Lorenzo Petiziol su Free al à imbastît un circo, cun imitadôrs, mâcs, saltimbancs e orchestrine. Di gjoldi, par cui che no i free nuie dal balon, ma al vûl savê il risultât. Su Telefriuli, invezit, Massimo Radina e Francesca Spangaro a àn come ospits un scuadre di balon locâl e a fevelin simpri di balon. Spangaro e je la plui brave a fâ lis radio cronichis, chest no si pues dineâ. Insome, il program al è par cui che al è sfegatât dal balon e nol rive a stâ cence azions di zûcs e coments. No rivi a viodi une vuere tra i doi programs, par vie che si indrecin a doi publics diviers.
Une vere programazion wall-to-wall (vâl a dî une cuintri di chê altre) si consume invezit lunis sere. Stes orari e stes «procès al Udin» al va in onde su trê emitentis. E duncje chi sì, che e je vuere. Oltri aes za nomenadis, chest an e va in cjamp ancje la scuadre de redazion furlane di «Telequattro», storiche emitente di Triest, che e à come diretôr responsabil Claudio Cojutti, za Rai e za vôs di «Tutto il calcio minuto per minuto», pes partidis dal stadi Friûl. Su Free, Marina Presello e fâs Sportissimo; su «Telefriuli», il tandem dal balon Radina-Spangaro al presente «Bianconero»; Telequattro al scree «Udinese a giochi fatti», cun Valentina Bearzi. In cheste suaze, o cjati la radio plui rilassant, fantasiose e mancul imbalsamade de robe che si viôt par tele. In particolâr, «Il balon al è di ducj» su Radio Onde Furlane. Che par altri si pues viodi ancje sul web. Vive la radio!
JAN TOTI