TERITORIS – SLOVENIE. Lis scuelis superiôrs in Slovenie

L’esam di maturitât al va daûr de scuele seguide: la diference plui grande jenfri i liceus e i istitûts tecnics-professionâi
83 MIL STUDENTS_ Se tal numar di Setembar su la pagjine che ogni mês il nestri gjornâl i dediche ae Slovenie o vin fevelât dal mont de scuele dal oblic, stant che lis lezions a son tacadis il Prin di Setembar stât, chest colp o cjacarìn in particolâr des srednje šole, che in pratiche a son lis nestris scuelis superiôrs. Dopo i nûf agns passâts tes elementârs (par sloven: osnovne šole) dai 6 ai 15 agns, fintremai ai 19 i arlêfs a podin sielzi une des dusinte superiôrs sparniçadis tal paîs: si va dai liceus ai istitûts tecnics e professionâi, che chest an in totâl a son frecuentâts di 83 mil students.
ESAM DI MATURITÂT_ In Slovenie a esistin diviersis formis dal esam di maturitât, che par sloven si pues clamâlu ancje (cjapant a prestit il non talian) matura. E je la cussì clamade splošna matura (maturitât gjenerâl), la poklicna matura (maturitât dai istitûts tecnics) e il zaključni izpit (esam finâl pes scuelis di caratar professionâl). Ae prime a podin cjapâ part i students che a àn seguît cuatri agns di liceu e che a àn chê di iscrivisi intune universitât: tal esam a àn di frontâ une prove di lenghe slovene, une di matematiche, une di une lenghe foreste e po provis di dôs altris materiis sielzudis an par an. Cui che al passe l’esam e po al à voie di jentrâ daurman tal mont dal lavôr cuntune formazion di stamp professionâl al à di frecuentâ un cors integratîf di un an (il cussì clamât poklicni tečaj, «cors professionâl»).
I students dai istitûts tecnics che a àn seguît lis lezions par doi o cuatri agns a seconde de impostazion de scuele a àn di frontâ il zaključni izpit o ben la poklicna matura: lis materiis di puartâ a son lenghe slovene, matematiche, une lenghe foreste, une materie tecniche e in plui un progjet specific. Par podê iscrivisi a un ateneu, i students dai istitûts a àn di preparâ ancje une cuinte materie e po seguî un cors di un an par preparâsi al esam finâl che al permetarà di jentrâ tune cualsisei universitât.
TANCJ DIPLOMÂTS_ Pe anade 2009/2010, tal mês di Lui a son stâts in 7500 di lôr a frontâ la splošna matura (il 91 par cent di lôr lu à passât) e 8400 a cjapâ part ae poklicna matura, li che a passâlu a son stâts l’88,5 par cent. In dut il paîs, a otignî in dutis lis provis finâls il massim dai vôts a son stâts dome in 18 te splošna matura (mancul di metât rispiet a un indaûr) e 33 te poklicna matura (cualchidun di plui rispiet al 2009).
INFO SU LA SCUELE VIE WEB_ I sîts internet che a àn a ce fâ cul mont des scuelis superiôrs a son une vore e par solit ben curâts e siôrs di informazions utilis pai zovins e pes lôr fameis. Di là dal spazi web dal ministeri de Educazion e dal Sport (Ministrstvo za Šolstvo in Šport, www.mss.gov.si – par sloven e par inglês), li che si cjatin dutis lis gnovis par iscrivisi aes superiôrs e la descrizion di ce che a ufrissin i istitûts, un altri sît uficiâl al è www.ric.si, il sît dal Državni izpitni center (Centri statâl pai esams), li che si podin lei dutis lis ultimis gnovis e ancje cjatâ i documents plui utii rivuart al mont de istruzion in Slovenie. Un sît une vore clicât al è www.dijaski.net (dijaški al vûl dî «studentesc», mintri che dijak al è «student des superiôrs»): al à une grafiche moderne e une vore colorade, ma il so pont fuart a son lis informazions simpri inzornadis pai students sei des elementârs sei des mediis.
ALESSIO POTOCCO