Sandra Pizzolitto Pupatello, ministre dal guvier dal Ontario in Canadà. Braurose des sôs lidrîs furlanis (di Morsan des Ocjis, ndr), par jê il Friûl al è un esempli ancje dal pont di viste economic cu lis sôs impresis e i vierç lis puartis dal Canadà par «vignî e insegnâ il lôr sisteme di lavorâ». Ma no dome: daûr de crisi il so paîs al sta cirint altris marcjâts e la Pizzolitto e cjale al Friûl come une ingrès privilegjât pe Europe.
di Christian Romanini
No ai mai rivât a fevelâ cuntun ministri furlan in cjarie dal guvier talian. Il Friûl a Rome nol à siei fîs tal esecutîf. Ma baste passâ l’ocean e o cjatìn Sandra Pizzolitto Pupatello.
«Hello Christian, I have the Minister at the phone» e la sô assistente mi passe par telefon propit Sandra Pizzolitto Pupatello, classe 1962, fie di furlans partîts di Morsan des Ocjis e rivâts dopo de seconde vuere mondiâl a Windsor in Ontario, Canadà.
Ministre Pizzolitto, al è un plasê e un onôr podê fevelâ cun Jê.
– Bundì Christian! Cemût? Il plasê al è gno e prin di dut ti domandi scuse: o vin scugnût corisi daûr masse timp par cheste interviste! O vevin di vêle fate prime, ma, tu sâs, o soi simpri indevant e i impegns a son tancj, scusimi inmò!… Benon, o podìn fevelâ par furlan, vere? Cuant che torni a Morsan, o fâs ancje un biel ripàs di furlan, ma cumò al è un pôc che no ven e se o ai di fevelâ di robis masse tecnichis forsit no mi vegnin subit lis peraulis, ma lin indevant! (e fâs une ridade, ndr)
Cognossie la nestre riviste?
– Sì, e rive ancje in Canadà: mê mari le ricêf chi.
Nus fevelie de Sô famee?
– Gno nono, il pari di gno pari, tal 1949 al è rivât di Morsan des Ocjis, pe precision di Sant Roc, la parochie dulà che si jere maridât. Gno pari invezit al è rivât chi che al veve 18 agns. Gno pari e mê mari e no si son cognossûts in Friûl ancje se e jere ancje jê di Morsan. Di fat e veve 11 agns cuant che e je partide pal Canadà tal 1951. Ma si son cognossûts chi a Windsor cualchi an dopo.
Cuâl isal il so prin ricuart sul Friûl o su la lenghe furlane?
– Jo o soi nassude a Windsor, ma mê mari, che rivade di piçule aromai e veve imparât benon l’inglês, cuant che o soi nassude e à decidût che l’inglês al veve di jessi la lenghe che o varès imparât a scuele e a cjase invezit si fevelave soredut par furlan. I miei prins agns a son stâts par furlan e par inglês, dutis dôs lis lenghis. In sostance o ai tacât a fevelâ par furlan e o ai finît cul fevelâ inglês: cuant che o ai tacât a lâ a scuele però o ai fevelât simpri plui inglês.
Cuant aie tornât a scuvierzi la lenghe furlane, che cumò e fevele benon?
– Cuant che o ai fat 19 agns gno pari mi à dit che e jere rivade la ore di jentrâ tal Club dal Fogolâr, dulà che si pues deventâ socis dome a une cierte etât. E li, stant simpri tal mieç di int che e fevele dome par furlan mi à scomençât a tornâ la lenghe furlane.
Isal dificil par une femine fâ politiche in Canadà?
– In prins agns che o ai tacât jo no jerin tantis feminis: tal gno partît, chel Liberâl, o jerin dome 4, di chestis une e jere la leader dal partît. La vite pes feminis parlamentârs, come par dut il mont, e je condizionade ancje de distance: di fat il Parlament al è a Toronto, la capitâl dal Ontario, e chest ti oblee a stâ fûr dute la setemane par tornâ a cjase a Windsor pal weekend. A son 4 oris di strade e par une femine al devente plui dificil partî domenie di sere e tornâ a cjase joibe. Chest al compliche une vore la partecipazion des feminis a la politiche. Difarent al sarès se o fos di Toronto. Cumò però al è ancje di dî che il numar des feminis al è cressût rispiet a cuant che o ai scomençât jo: cumò tal nestri “cabinet”, l’esecutîf dal guvier, il 30% a son feminis.
Cemût isal tacât il So impegn a servizi de comunitât?
– Come che o disevi o soi jentrade a 19 agns tal Club dal Fogolâr di Windors e mi soi impegnade simpri di plui. O soi restade par 10 agns tal esecutîf fint a deventâ Presidente dal 1994-95 cuant che o soi stade elete in Parlament e o ai scugnût dimetimi parcè che lis incarghis a jerin incompatibilis. E je stade une biele palestre di vite: o pensi che lavorâ cui Furlans e sedi une biele esperience, ma ancje impegnative parcè che o sin un popul dûr. Par chest o pensi che se une femine e rive a fâ la President di un Fogolâr furlan e e rive a sorevivi, e pues fâ di dut (e fâs une ridade, ndr). Jo o dîs simpri che o soi montade su lis spalis dai Furlans par rivâ a jentrâ fint in Parlament e vuê ogni volte che o cjati un Furlan dal Club lu ringrazii parcè che i dîs che al è ancje mert so se o soi rivade dulà che o soi.
– Cuâl isal il So rapuart cu lis Sôs lidrîs furlanis?
O pensi che al sedi gambiât, parcè che pe mê gjenerazion, che e je cressude chi in Canadà, e je simpri stade in prin plan la vite dal paîs di divignince dai gjenitôrs. Cuasi ducj i furlans a son rivâts di un paîs piçul e duncje si veve simpri iniment il mont rurâl furlan, une vore difarent de grande citât di chi. E se tu vegnis tes fameis dai Furlans tu cjatis lis cjasis che a àn l’ort par daûr, come che a vevin i lôr vecjos in Friûl, mantignint cussì il leam cu lis origjins. Invezit cumò che o soi la titolâr dal Ministeri dal Disvilup Economic e dal Cumierç o ai la pussibilitât di viodi il Friûl come che al è vuê e che al è gambiât tant.
Ven a stâi?
– In Friûl vuê a son scuelis, universitât e ricercje, inovazion cun nivei di ecelence. Magari cussì no, la plui part dai Furlans dal Canadà no san avonde di trop che il Friûl al è gambiât e miorât ta chescj agns. E chest al è parcè che i Furlans a àn simpri mantignût un leam midiant de famee, dai afiets dal privât, ma i zovins no si son domandâts “Ma ce fasino di lavôr in Friûl?”. Chest al è stât un grant limit: par esempli, chi e je tante int che e je rivade cul mistîr, ma no si è inmò rindude cont che a Spilimberc o vin un centri di riferiment mondiâl pe creazion dal mosaic.
Jê ce aie fat par gambiâ cheste situazion?
– Cuant che o jeri President dal Fogolâr o vin fat sgambis a nivel imprenditoriâl tra Friûl, Windsor e Toronto parcè che o jeri e o soi convinte che lis gnovis gjenerazions dai Furlans dal Canadà a àn di cognossi il furlan e il Friûl di vuê. Ma mi pâr che i miei coleghis furlans di chi, ancje plui zovins, a àn inmò di savê e cognossi chest.
La Sô visite in Friûl in ocasion de assemblee de Confindustrie di Udin ai 15 di Setembar dal 2008 e je inmò vive tai ricuarts di chei che le àn sintude a fevelâ cun grande braure de Sô identitât furlane: ce ricuart aie di chê assemblee?
– O savevi che no saressin stâts dome Furlans, ma che a jerin ospits ancje di dute Italie. Ma o ai pensât che stant che o jerin a Udin, in Friûl, no podevi no fevelâ par furlan. E no lu ai fat dome parcè che o savevi che la maiorance a jerin furlans e mi varessin capide: o volevi fâ viodi che jo o soi une fie di chê tiere e duncje no soi tant distant di chei che mi scoltavin, ancje se o soi di Windsor. No soi dome une Ministre dal Canadà e no ai tal cjâf dome il business, ma o ai un leam strent cul Friûl. Fevelâ furlan e je stade la mê maniere par jentrâ in sintonie cu la int che mi scoltave.
Ce strategjie aie iniment par un disvilup economic tra Canadà e Friûl?
– Il Canadà al à int che e ven di dut il mont e cheste risorse e pues jessi une vore util pal cumierç viers ducj i paîs. Par noaltris al è impuartant podê contâ su la int che e ven di chei paîs par podê disvilupâ il rapuart comerciâl cun chei Stâts. E pal Friûl al à di jessi la stesse robe: al è plui facil cjapâ la strada che ti puarte dulà che tu âs za amîs, un contat come che al è chi in Ontario dulà a son tancj Furlans.
Cemût ise la situazion economiche?
– O vin di tignî presint che il nestri marcjât a son i Stâts Unîts dulà che o vevin ancje plui dal 80% des relazions economichis. Cu la recession che e à cjapât ancje lôr, cumò o sin obleâts a cjatâ altris marcjâts e un al è propit chel cu la Europe.
Ce vêso fat in cheste direzion?
– Il guvier federâl al à decidût di promovi acuardis cui Stâts de Europe. Alore l’an passât o vin scomençât a imbastî un rapuart Canadà-Europe che al varès di lâ in puart forsit cul 2011. Il Friûl o pensi che al podarès jessi la nestre puarte privilegjade par jentrâ in EU.
Cuâi sono i vantaçs?
In Friûl e je la imprese piçule e cheste impostazion imprenditoriâl e risulte plui elastiche e e reagjìs miôr di une grande industrie devant de crisi. Invezit in Canadà a son in percentuâl plui multinazionâls. E duncje cuant che e je rivade la recession il Friûl al à tignût bot miôr che no in Ontario dulà che lis grandis impresis a son vût plui conseguencis negativis: cuant che la aziende e à une dimension familiâr no mole par strade la int cence lavôr come che invezit e fâs une grande industrie. Chi in Ontario la disocupazion e je cressude une vore. E duncje chi o vin di judâ l’imprenditôr piçul par modificâ chest sisteme economic.
Cemût?
– Cjatant imprenditôrs europeans che a sedin disponibii a vignî in Canadà e insegnâ il lôr sisteme di lavorâ ai impreditôrs canadês.
E ce fasial il guvier dal Canadà pai zovins e lis lôr lidrîs?
Za tal 1973 il nestri Prin Ministri al à scomençât cu la politiche de “multiculturalitât”. Chest parcè che o vin di jessi difarents dai Stâts Unîts dulà che un imigrât al à di deventâ american e vonde. Invezit noaltris canadês o volìn che i imigrâts a mantegnin il leam cu lis lôr lidrîs cence pierdi lis origjins.
Pensie che la lenghe furlane e podedi judâ?
– Sì e il Fogolâr al pues fâ tant: cuant che o jeri President o vin fat rivâ un professôr de Universitât dal Friûl chi a Windsor par insegnâ la lenghe furlane par dôs setemanis. E dopo al è lât a Toronto par fâ la stesse robe.
I zovins fevelino par furlan?
– La situazion e je gambiade. A fevelin mancul il furlan: par esempli la femine di gno fradi no je nancje taliane e duncje ancje i fîs a capissin di mancul il furlan… juste cualchi peraule. Ancje jo cuant che o ven i Italie par afârs o pues fevelâ par furlan dome cui miei cusins parcè che se no lu feveli in Friûl no lu feveli sigûr di chês altris bandis de Italie.
Jê tropis lenghis fevelie?
– Furlan, inglês, un tic di talian che e o varès di miorâ, ma ancje il francês par vie che si lu fevele in Canadà e mi covente pal lavôr.
Il furlan i aial ostacolât o favorît di imparâ plui lenghis?
– Nol è stât par nuie un ostacul, anzit. Mi à judât par imparâ il francês parcè che mi somee che il furlan al sedi plui dongje che no il talian. E po, cumò cuant che o voi in Messico par lavôr, no stoi tant timp par imparâ cualchi peraule di spagnûl parcè che ancje cheste lenghe mi somee une vore dongje dal furlan. Duncje o pues dî che la lenghe furlane mi jude a imparâ ancje lis lenghis forestis.
Tal mont a son Furlans in tancj paîs: podaressie jessi il furlan la lenghe “lenghe francje” pes comunitâts dai Furlans ator pal mont?
– Sì, parcè che o pensi cuant che i Furlans si cjatin pal mont, chest al è za un pas in plui: il fat di vê lis stessis origjins al permet subit di jessi in sintonie. E al jude ancje i rapuarts economics parcè che tu ti sintis za de stesse famee.
I zovins ce pensino des lidrîs furlanis?
– O pensi che i gjenitôrs a àn di continuâ a mantignî il furlan parcè che i zovins a àn voie di sintîsi furlans. Jo o ai un nevôt di 17 agns che al fevele une peraule o dôs di furlan. Ma i ten a lis sôs origjins: ancje se al va inmò a scuele, al lavore tal Fogolâr parcè che al à gole di mantignî cheste sô identitât furlane. A chê etât si tache a pensâ a lis fantatis (e riduce, ndr), ma distès ogni weekend lu passe tal Fogolâr e i siei amîs a son Furlans, ancje se di seconde e tierce gjenerazion furlane canadese.
Cuant tornie in Friûl?
– O vevi programât di vignî in Jugn che o jeri in Italie par lavôr, ma no ai rivât a fermâmi… ma magari la prossime volte che o rivi a vignî, ti visi e si cjatìn di persone!
———————————
SGRIFE
Come che si lei te interviste, la ministre Sandra Pizzolitto Pupatello e viôt grandis pussibilitâts di sgambis economics e di cognossincis jenfri Friûl e Canadà. O viodìn za i triestins che, jessint chest rapuart privilegjât inlidrisât ancje su lis lidrîs furlanis, a ciraran di no dâi cuissà ce impuartance. Rivarìno a pierdi ancje cheste ocasion?
