ATUALITÂT. Pre Toni e la famee

“L’àn pierdude lant a messe in chê dì ch’a son sposâts” al è il titul dal gnûf libri di Pre Antoni Beline, che Glesie Furlane e à publicât. Un libri cun profondis riflessions su famee e matrimoni, che al po judânus e fânus lûs in chescj timps imberdeâts che o stin vivint.
Une leture che nus fâs cjapâ cussience su chei che a son i plui impuartants valôrs te vite.
Pre Antoni al partìs contantnus lis vicendis storichis e culturâls des nestris fameis di une volte, dal lôr mût di vivi  “lavorant di buinore fin gnot”, cu lis dificoltâts de emigrazion e de miserie. Nus tabaie di cemût che ancje se lis prospetivis di vite no jerin des plui gratificantis, i zovins si maridavin sperançôs e la union e resisteve a dutis les intemperiis de vite. Paragons che a vegnin fats ancje cui timps di vuê, li che si vîf miôr, ma al pâr che tignî e mantignî in salût chescj valôrs al sedi simpri plui complicât. In chestis pagjinis o cjatarìn riflessions su la sessualitât, su cemût che la glesie e à influît in passât su chest argoment: “Pe glesie, la sessualitât e à vût un intent sôl: chel de procreazion… Al è clâr che par podê vê une vision positive dal matrimoni, si à di vê une vision positive ancje des realtâts umanis, de sessualitât e vie”. E dopo, lant inmò indenant, un pinsîr su la mancjance dai fruts: “Intun moment di strache, di sfiniment, di flaperie culturâl e morâl, i prins a sparî a son i fruts. Po dopo i vecjos, che si ritirin e a tasin. Al mancje cussì l’avignî e il passât e si cjonce la glagn de storie. A restin dome chei che a produsin, e chei che a pensin ancje a mangjâle…” O leiarìn lis considerazions di Pre Toni e i siei conseis par cjatâ il just ecuilibri inte cressite corete dai fîs e o cjatarìn la sô comprension pai gjenitôr di vuê che a àn simpri plui dificoltâts: “…ma tirâ sù la canaie, e la canaie tal mont di vuê, al è il mistîr plui dificil che si puedi imagjinâ”.
O cjatarìn i dolçs ricuarts dal pari, de none, de mari e dutis lis maris, cuntun pinsîr afetuôs par chês che a àn patît: “Jo o speri, cuant che si larà di là, cence nissune premure, di no cjatâ in prime file dome lis maris dai sants, che a àn za vût il lôr premi e la lôr consolazion in cheste vite, ma di cjatâ lis maris di ducj i sassins, i delincuents, i pecjadôrs, i barbars, i stramps e i violents di chest mont. Il Signôr che lis à clamadis al don e al misteri de maternitât, cence dâur ancje la sodisfazion di tante mission, lis strenzi dongje di se, ur sui lis lagrimis e ur disi chel grazie che no àn mai sintût in vite, ni dai fîs ni tant mancul dai forescj”, o cjatarìn ancje la storie comovent dal grant amôr di Romeo e Idute.
Insome, chest librut al è preseôs e al mertarès un so cjantonut in ogni famee.
Come che lu presente Glesie Furlane, al è “une pierute che e à i colôrs di culì intal mosaic de storie universâl, rosute cul profum di culì intun prât larc come il mont”
Gjoldìn duncje dai siei colôrs e dal so profum che, come ducj i libris di Pre Toni, no nus lassarà indiferents.
Alida Pevere