Cuant che un si diplome intun liceu, i gjenitôrs si domandin simpri: “Cuissà se al varà voie di fâ une facoltât sientifiche o une umanistiche”. Ma la domande plui juste di fâsi, chê che si fâs pardabon il fantat par decidi, e je “Dulà aio di lâ a studiâ: a Udin o di une altre bande?”.
Si, parcè che prime de voie di imparâ une robe o chê altre e ven la voie di lâ fûr di cjase, di lâ a vivi cui amîs e di fâ dut ce che tu as voie di fâ. E va tu a spiegâ a tô mari, se tu sês un fantat di disevot agns, che la facoltât di letaris di Triest o di Padue e je une vore plui ben organizade di chê di Udin. Prin di dut tô mari e capìs subite che chê li e je nome une scuse, e dopo, al è pôc ce inventâsi: al è impussibil che une cualsisei robe di un cualsisei puest (massime Triest, naturalmentri) e sedi pardabon organizade miôr di une robe di Udin.
Cussì, chei che a àn voie di lâ fûr di cjase a scuegnin sielzi une facoltât che a Udin no je. Chei altris, a scuegnin stâ a cjase cui gjenitôrs. Ma dongje di chês dôs categoriis, a son ancje chei che a stan a Udin par sielte. Chei a son i furlans plui nostrans: chei che si son iscrits ae universitât nome par studiâ, che a àn voie di fâ sparagnâ i gjenitôrs e no fâur spindi bêçs in afits, chei plui braurôs e plui pratics (e soredut, chei che a crodin di no vê nuie di imparâ dai triestins, ancje se a son professôrs). E no covente che us stevi a dî che la universitât di Udin e je la plui furlane che e esisti, e no nome parcè che si insegne ancje il furlan. Sù po, al è clâr come il soreli: tirade sù cu lis sovenzions pal taramot, cu la acuile tal simbul, e cumò ancje cuntune retore cjargnele. No par nuie, te universitât di Udin il plui grant numar di iscrits lu àn lis facoltâts di inzegnerie e di economie, che a rapresentin lis veris vocazions dai furlans: mateâ e sparagnâ.
Par dî la veretât, tai ultins agns a Udin si iscrivin ancje une vore di fantats stranîrs: albanês, cravuats, slovens e soredut tancj venits (cemût? I venits no contin come stranîrs?). In sumis: ancje Udin al à i siei universitaris fûr di cjase e al è par chel (sigûr no pai furlans che a àn nome voie di studiâ, intindìnsi) che a son nassudis lis seradis di fieste tai ambients de citât, i famôs “miercus universitaris”. Parcè che prime di vê i students stranîrs, a Udin, par ce che mi ricuardi jo, no esisteve nancje il miercus di sere.

Bete Di Spere