E je une di chês scuviertis che di sigûr a lassin il segn, di chês che a son destinadis a meti un pont fer inte storie di un lûc, di une regjon.
Martars ai 22 di Lui, dopo 3 campagnis di sgjâf, in chel tumul di tiere clamât “tumbare” a Merêt di Tombe al è finalmentri vignût in lûs il scheletri di un om vivût tor i 4.000 agns indaûr, dal sigûr un dai rinveniments plui antîcs de nestre regjon.
Il sgjâf, puartât indevant dal grup di protostorie de Universitât dal Friûl e guidât de prof.e Paola Guida e de prof.e Elisabetta Borgna, al fo tacât intal 2006, par studiâ chest fenomen dai tumui funeraris une vore frecuents inte nestre regjon (viôt la cjartine).
Za intal 2000-2002 di fat si veve procedût al sgjâf e al studi di un altri impuartant monument di chest tipo a Sant Svualt, dongje Udin, che al veve puartât a impuartants risultâts.
LA STORIE DE TUMBARE_ Se il tumul di Merêt al è rivât intîr fint al dì di vuê al è ancje grazie al paron dal teren che agns indaûr, pront par plantâ un vignâl, al veve domandât e otignût il permès par splanâ vie chest “grum di tiere”. Ma rivât li devant al à decidût di lassâlu; cuale decision plui sensade!
Cussì, intal 2006, al è tacât il sgjâf dal grup di protostorie de Universitât dal Friûl. Inizialmentri al fo sondât il sît funerari, par cirî di capî l’esemplâr e la tipologjie di costruzion; il sgjâf al è lât indevant sezionant il tumul, metint in lûs lis stratigrafiis e permetint cussì une descrizion de struture. Al è duncje vignût fûr un complès cussì disponût: parsore de sepolture vere e proprie al fo costruît un côl fat di claps di mediis dimensions; po dopo chest al fo cuviert cun diviers strâts di tiere, savalon e argjilis, rivant a une altece di cirche 6 metris par un diametri di 25. Une struture che o podìn ben definî come la plui grande di chest gjenar cjatade fint cumò in Italie.
DOPO 4.000 AGNS_ Rivâts cul sgjâf a nivel dal plan di costruzion, viers il centri i archeolics a àn notât une diferenziazion inte consistence dal teren; cussì a son lâts plui in profonditât, tirant fûr une fuesse che e sprofondave par diviers centimetris. Rivâts a cirche 80 cm sot ve ca la scuvierte: planc planc a àn tacât a vignî in lûs i rescj di un scheletri, ben conservâts e ancjemò in conession tra di lôr. Ae fin dal delicât lavôr par netâ i vues, seguît dal antropolic Alessandro Canci , de Universitât dal Friûl, si à cirût di rigjavâ plui notiziis pussibilis dal stât di conservazion dal scheletri: prin di dut il muart al jere un om, zovin, di etât comprendude tra i 17 e i 18 agns (il dint dal judizi nol jere ancjemò dal dut vignût fûr); al jere deponût in posizion supine, cul cjâf a soreli jevât, come a Sant Svualt, ma a diference di chel al fo sepulît tal teren, no inte calote di claps. I vues a jerin ben mantignûts in conession par vie dal fat che probabilmentri al jere stât viluçât sù intun linçûl (un peçot, un sudari) e cun di plui metût dentri intune casse di len. Nol jere tant alt, a pene 1,50 m, di corporadure vindrice, ancje se nol presentave malatiis di sorte. I dincj invezit a jerin une vore fruiâts, segn di une diete coriacee (probabilmentri al mangjave farinis masanadis no tant finis).
Il muart, che al è stât simpatichementri batiât dai archeolics “Rovul” (par vie che inte zone di Merêt un dai cognons plui presints al è Della Rovere).
Rovul nol veve un furniment, no jere cheste usance; ma il fat che al fo sapulît sot chest monument cussì imponent al dimostre il so rûl di paron dal vilaç, no cate la sô zovine etât.
Pôcs elements a son stâts cjatâts fûr de tombe e a àn permetût di datâ la sepolture a la ete dal Ram (tra i 4.000 e i 5.000 agns indaûr). Ma la datazion precise e vignarâ dade dome dopo che cualchi frament di vues al sarâ mandât in plui di un laboratori pe analisi dal Carboni-14, come che al jere za stât fat ancje pal om di Sant Svualt.
Par chel che al rivuarde i elements cjatâts dal sigûr e risalte une ponte di frece interie.
Parsore dal tumul a son stâts cjatâts diviers creps di ceramiche e chest al fâs pensâ che la struture, une volte finide, e fos ancje un lûc di cult dai antenâts, dulà che i abitants dal vilaç si cjatavin par celebrâ i rîts, intun periodi che al le de ete dal Ram fint a chê dal Bronç.
Venusia Dominici
__________________________________
Tumui in Friûl:
1. Gjais, Marsuris, Rive de Bares (Davian, Pordenon)
2. Molinat di Tesis (Manià, Pordenon)
3. Sant Roc di Taurian (Spilimberc, Pordenon)
4. Vacîl (Spilimberc, Pordenon)
5. Sant Durì / Montagnole Tombe di Sore,
Montagnole Tombe di Sot (Flaiban, Udin)
6. Tombuce (Sedean, Udin)
7. Sant Zuan di Baracêt (Cosean, Udin)
8. Tumbare (Merêt di Tombe, Udin)
9. La rive di Toson (Basilian, Udin)
10. Tumbule di Foscjan (Vilalte di Feagne, Udin)
11. Tombe (Cjampfuarmit, Udin)
12. Sant Svualt (Udin)
13. Selvis (Remanzâs, Udin)
14. Cjasâi Maline (Pradaman, Udin)
15. Tombe di Lonzan (Premariâs, Udin)
16. Barbean (Spilimberc, Pordenon)
17. Sant Zorç da la Richinvelde (Spilimberc, Pordenon)
LA INTERVISTE - / Toni Capuozzo: «Ognidun al bale cun sô agne»
Oscar Puntel
Nus à lassâts Toni Capuozzo, il grant gjornalist. A son za ce tancj i ricuarts che si viodin ator su di lui, parcé che al jere un om ce tant stimât e amât. Al jere un amì de La Patrie dal Friûl, e al à vût scrit ancje par nô. Sì, par furlan. Parcé che […] lei di plui +
Zovins di gale / Sborf, il zûc par induvinâ e imparâ peraulis par furlan che al à za concuistât miârs di personis
Erika Adami
Daûr un grup zovin che al à a cûr la lenghe furlane Un sborf di un biel colôr vert slusint al è il simpatic compagn di zûc par cui che al à voie di induvinâ e imparâ peraulis in lenghe furlane sul propri dispositîf digjitâl. Chest de fin di Març, cuant al è rivât Sborf […] lei di plui +
Galerie fotografiche / Cuinte edizion di “Stin dongje ae patrie”
Redazion
Pe rassegne Avostanis, Domenie ai 4 di Otubar li dai Colonos si è tignude la cuinte edizion di “Stin dongje ae Patrie“. La storiche riviste furlane e a fât fieste par i siei otante agns e e a cjalât al avignî adun cul mont de culture, de musiche, dal associazionisim, dal sport tal ricuart no […] lei di plui +
Stin dongje ae Patrie / La storiche riviste furlane e fâs fieste par i siei otante agns
Redazion
Pe rassegne Avostanis, Domenie ai 4 di Otubar aes 3 dopomisdì li dai Colonos a Vilecjaze di Listize tierce edizion di Stin dongje ae Patrie. La storiche riviste furlane e fâs fieste par i siei otante agns e e cjale al avignî adun cul mont de culture, de musiche, dal associazionisim, dal sport tal ricuart […] lei di plui +
La piçade / Salts, lavoradôrs e… laris. Almancul i laris a fevelin par furlan
Mastiefumate
Che il rapuart tra il Messaggero Veneto e la lenghe furlane nol fos dai miôr, si saveve. Par esempli su la partide dal secul tra la nazionâl furlane e chê groenlandese, nancje une rie par furlan. Si spietavin che al vignìs ripuartât a caratars cubitâi il sproc tal strisson puartât in cjamp dai zuiadôrs intant […] lei di plui +
Gnovis pai fruts / I Gnognosaurs a imparin a svolâ: al rive in edicule «Tal blu piturât di blu», il gnûf album di colorâ
Redazion
Daspò dal sucès dal prin album vignût fûr a Nadâl, i simpatics dinosauruts che a fevelin par furlan a proponin pal Istât une gnove aventure: il professôr Einsaur e il so fedêl assistent Blik a provin di svolâ, ispirâts dai pterodatils. Rivarano? ◆ A partî de fin di Jugn al è rivât tes ediculis dal […] lei di plui +



