Sfuei Mensîl Furlan Indipendent
Archivi de Patrie

BASTIAN CONTRARI. Sgorlon nol jere un dai nestris

............

Carli Sgorlon, mancjât la gnot di Nadâl dal 2009, al è sigûr il romanzîr furlan plui famôs, ma un dai mancul furlaniscj di chei che a vedin scrit par furlan.
Su la cualitât artistiche e de scriture si à fevelât miôr di cemût che o fasarès jo. Ma dilà des celebrazions, che cualchidun si è lamentât che no jerin avonde, un grant al va onorât ancje cu la veretât e no dome cu lis trombis de retoriche: di Sgorlon tant che inteletuâl al va marcât alc.
CUINTRI LA BIBIE_ «Sgorlon nol è dai nestris» si intitulave la rispueste che pre Toni Beline – intal Lui dal 1984 – al deve su La Patrie ae letare “G. M.” di Gurize che al protestave: «(…) ancje vint stime, sicu furlan, pal nestri grant scritôr Carli Sgorlon, distès no aceti la sô viodude che la Bibie voltade par furlan e sedi une vore “artificiosa” che no ves coventât. Par cuale reson? Secont lui, parcè che “i furlans a podevin benissin leisi la Bibie par talian”. (…)».
Sgorlon al de di fat chel judizi penç su la Bibie par furlan, opare che par ducj e insiore la nestre lenghe. E no dome: a ogni pas indevant in Parlament de leç 482 su la tutele des minorancis linguistichis (aprovade tal 1999), e jesseve une interviste al romanzîr li al marcave la inutilitât dal provediment.
OM DI ALTRIS TIMPS_ Si à vût let che al jere un om di altris timps. E di fat al jere cussì: al veve la mentalitât de Societât Filologjiche che Felix Marchi al diseve: «Co Mussolin no le à disfate, al vûl dî che i leve ben». Chê Filologjiche, e chê classe dirigjent furlane che i de cuintri a fuart a Achille Tellini e ai altris furlaniscj: il furlan al jere une “sentinele orientâl”, il popul furlan «salt, onest e lavoradôr» un fedêl servidôr de Italie. La logjiche de “Piçule Patrie” rispiet a une che e varès di jessi chê grande: la Italie. Cui che al scombateve pal Friûl al jere “austriacant”. Passade la Seconde Vuere cheste mentalitât si mude ma e reste, par scombati il comunisim: di “austriacant” cui che si bat pal Friûl al devente “titin” e il furlan al covente massime par fâi cuintri al mont slâf-comunist.
I FURLANS PAR SGORLON_ Tes intervistis Sgorlon al descrîf il popul furlan tant che «un popolo di contadini, di povera gente, di emigranti, (…) non ha avuto il periodo comunale, non ha avuto il periodo rinascimentale tantomeno quello umanistico. Io cerco di raccontare la storia di un popolo che nessuno ha scritto». La storie di un popul sconfit de storie, si diseve de sô opare.
Nissun acen a la Joibe Grasse dal 1511, il riviel plui grant de storie rinassimentâl che al obleà Vignesie a inmaneâ la Contadinance par rapresentâ i dirits dai contadins, o de Universitât di Cividât vie par jessi inviade dal 1353 (tant par dî, chê di Viene e ven fondade intal 1365), o che dal 1231 si vè la prime sentade dal Parlament furlan (la Magna Charta e je dal 1215), o dal Patriarcjât… Cence smenteâsi il taramot dal 1976 li che il Friûl nol è stât sconfit ma al è rivât a tirâsi sù, unît de sô lenghe. Invezit al celebrà la figure di Marc di Davian, tant par gambiâ un furlan servidôr, in chel câs dal Imperadôr Austriac.
IL GAMBIAMENT DI IDEE_ Di resint però al veve declarât di vê gambiade idee. Il motîf? Subit dit: in face de grande menace dai “extracomunitaris”, puars oms che a vegnin a cirî lavôr – come i furlans a faserin une volte – , il furlan al devente util par difindisi di chestis gnovis culturis. No par nuie Sgorlon al à vût il grant agrât dal senadôr de Leghe Mario Pittoni (no un dai piês in fat di furlan, ma simpri fedêl al so “capo”: Milan). Piês il tacon de buse, insumis: ancjemò une volte il furlan al covente, ma par difindi la Italie, migo parcè che al vedi une sô dignitât.
I MERITS_ Si à di dî però che pe plui part dai furlans e talians, de opare di Sgorlon i restarà nome che il popul furlan al è nobil, dignitôs, e che al à une lenghe. Ancje se par lui al jere un popul, ma sconfit, che al veve une lenghe, ma no plui util. Al restarà che al veve gambiade idee. Ancje se la idee le à gambiade par la emergjence causade di cualchi nemì.
Vino di ringraziâlu – nô sostegnidôrs de identitât furlane – par chest che al è un grant servizi, ma dal dut involontari? No sai.
Dree Venier

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +