Sfuei Mensîl Furlan Indipendent
Archivi de Patrie

Sorelûc di Ron Howard su la mont Cjanine

Luciano Lister

Di Març e cun probabilitât fintremai ae fin di Mai, la alte Val dal Lusinç in Slovenie e je ancjemò il set di un film american. Al inizi di Març un regjist innomenât a nivel mondiâl al è stât a dâ un cuc ae zone. Il so non pal moment al è tignût segret, ma istès lis cjacaris a zirin sveltis e te Val si dîs che si trati di Ron Howard. Te suaze di chel che al sarà un film di azion, lis senis a varessin di jessi ziradis su la piste di schi in localitât Graben, su la cueste slovene de Mont Cjanine e su la mont Stol.
◆ A judâ la scuadre di plui o mancul 400 operadôrs cinematografics, vie pes ripresis a saran ancje cirche 100 abitants de zone.
◆ Tant che il non dal regjist, ancje lis informazions sul film e sui nons dai atôrs che a son rivâts o che a rivaran te Val dal Lusinç par zirâlu a son inmò segretis; istès ancje di chest si fevele: probabil che il film al sarà il sest de serie incentrade sul agjent de Cia Jason Bourne, interpretât di Matt Damon.
◆ Di cualchi an incà la Val dal Lusinç e je dispès il set di film internazionâi. Tal Atom dal 2019 a àn zirât li la serie “The Wheel of Time” (par furlan “La riode dal timp”), dulà che e recite ancje Rosamund Pike. E no stin a dismenteâsi che cualchi an indaûr, massime te zone di Pleç (Bovec), te Val a àn zirât lis ultimis senis de seconde part dal film “The Chronicles of Narnia” (“Lis cronachis di Narnia”).
◆ Te Val dal Lusinç si spere che dâ acet a chest set cinematografic juste prime dal inizi de stagjon turistiche estive al dedi un sburt intun periodi no masse facil a nivel economic. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +