“Di ce vacine sêstu?”. “Jo o soi un AstraZeneca”. “E tu?” “Un Pfizer”. “Jo invezit o soi un Johnson&Johnson”… Ca di pôc timp, invezit che pai segns zodiacâi di nassite o pe nestre scuadre di balon, si cognossarìn pes vacinis che nus varan inietât. Lu scrivaran ancje sui documents, salacor. Al sarà dome un dai cambiaments de percezion dai rapuarts sociâi che la pandemie nus lassarà: purtrop a coventaran agns par tornâ ae vite “normâl”, e i dams materiâi, economics e no dome, che si puartarìn daûr a saran cetancj. Forsit e cambiarà ancje la nestre “identitât”: chê individuâl, e ancje chê coletive. Alc o sin za daûr a misurâlu: la cressite dal malstâ psicologjic inte popolazion, ancje chê plui zovine, e je il spieli di un moment malsigûr e simpri mancul decifrabil, là che a difondisi nol è dome il virus ma ancje il dubi di no jessi bogns di saltâ fûr di un “tunel” che nissun al pensave tant lunc.
◆ Par fâje, dut câs, o varìn bisugne no dome de sience, ma soredut de cussience. Prin di dut, de gravitât de situazion. In Americhe a son muartis mieç milion di personis, la metât de popolazion dal Friûl. Par tant timp a àn metût il cjâf sot dal savalon, ma cumò la cognizion de emergjence e à sburtât chê int a frontâ il probleme cuntune mobilitazion massive, vignude masse tart ma che e cjape dentri ducj. E cussì, cumò che a àn decidût che la robe impuartante e je chê di vacinâ, a vacinin pardut: dai miedis, tes farmaciis, fintremai tai centris comerciâi. In Ingletiere, compagn. Chenti invezit o spietìn: cence vacinis, cence acuardis cui miedis, cence struturis teritoriâls, cence ideis. E, chel che al lasse scaturîts, cence organizazion.
◆ Il popul che al à insegnât cemût che si jeve in pîts di un taramot, e ancje cemût che si met in pîts un sisteme eficient di Protezion Civîl, al è daûr ancjemò a domandâsi in ce maniere frontâ i problemis che il Covid al à puartât pai ospedâi, pes scuelis, pes impresis: e intant che o spietìn i fats, si jemplìn di peraulis, pensant che la retoriche e plati dutis lis magagnis. Alore tocje scoltâ i sorestants che nus contin che o sin in vuere cuntun nemì traditôr. In realtât il virus nol à il caratar dai oms, nol dopre furbiziis o imbrois: al fâs dome il so lavôr, che al è chel di replicâsi. Nô o varessin di fâ dut ce che o podìn par impedîlu. Invezit a son mês che o tontonìn cence rivâ a sclarîsi in ce maniere che o podarìn vignî fûr dal pantan. Ce spietìno? La “variante furlane”? La nestre maniere di marcâ la diference e varès di jessi chê di fâ di dut par scurtâ i timps e par slargjâ la difusion no dal virus, ma de protezion de int: che cun ducj i dubis che ognidun al pues vê, e passe par fuarce traviers de imunizazion di plui personis pussibilis. Cence obleâ, ma ancje cence frenâ. Invezit no lu stin fasint, parcè che ancje se la sience nus jude, nus mancje la cussience. ❚
