Pieri Pinçan, “Gjviano di uno vôlto”, Tumieç, 2000

“Ce che ju neštis vecjus ei ši son tramandâts a bocjo da pari a fîs, o da von a nevuots cumò nol è âti pušibil meti in pratico. Nomo cul meti in šcrit ce che luor ei contavo, a ši po fâ in maniêro che dut a nol leti pierdût. Parcè che ju vons cumò nišun al à timp di šcoltâju âti, ju gjenituors ei àn la televišion che, fôr dal lavour, e jur tol dut il timp e parcè no, ancje la voio di ocupâši dal timp passât (…)”

◆ Pieri Pinçan (o Di Vau) i vûl ben al so paîs, cul so tor dut colorât che si lu viôt ben ancje di lontan, un dai tancj paîs de Cjargne (ma, magari cussì no, aromai ancje di tantis altris bandis dal Friûl) che a son daûr a disvuedâsi: intal 2000 i residents a jerin sîs e il plui zovin al veve 63 agns. Si puedie lassâ lâ in dismentie dute la storie di un paîs? Pieri nol podeve acetâ. E si à tiradis sù lis maniis par meti adun chest libri di passe 220 pagjinis, dut scrit inte variante furlane dal Cjanâl di Guart e finanziât di une famee di Viterbo che ca sù e à une cjase e che si considere gjivianote tant che i gjivianots autoctons.
◆ Un lavoron di ricercje, chel di Pieri: la storie dal paîs fin des origjins (il prin document al è dal 1322), la glesie (e il non di ducj i predis dal 1764 fin al 2000), la scuele, la latarie turnarie, il cimitieri, la toponomastiche, lis cjasis, lis vueris (cui nons dai muarts), il bosc cun dutis lis barufis pai confins e cu la istituzion dal consorzi dal 1869, la maine, la canoniche, il grup corâl (cui nons dai mestris), la religjon, lis tradizions, lis fiestis e v.i. Une piçule racuelte di poesiis dedicadis a Gjiviane e po la part salacor plui straordenarie, vâl a dî l’arbul gjenealogjic di ducj i abitants dal paîs, famee par famee, tacant dal 1774. E cussì, o vignìn a savê cualis che a jerin lis fameis plui antighis, ce cognons che a vevin, ce sorenons (un plui biel di chel altri: Piel, Sissulo, Rincjin, Tololò, Cjastigno, Bissodio, Sbrego, Tiribiri, Vuali Vert…) e cuâi che a jerin i nons plui frecuents. Infin, une tabele des fameis di Gjiviane dal 1800 al 1900, e po dal 1930 al 2000. E no si pues tasê dai sedis dissens fats dal autôr e des cinc fotografiis di epoche. Ducj i gjivianots sparniçâts ator pal mont a scuegnin dîi un graciis grandonon a cheste perle di libri. ❚