Peraulis di sperance par l’an che al ven

“Avrei voluto darti il calore che l’inverno richiede, il più caldo maglione che ti piace indossare.[...] Ed io, e il mio cuore continuiamo a danzare… Abbracciando il sole“. A finìn chest an di malinconie cun tun messaç di sperance, acompagnât dal sun de ghitare e la vôs inconfondibil di une zovine promesse musicâl furlane: Nicole Coceancig.
Cjantautore di classe 1998 di Premariâs, Nicole si svicine ae musiche scuvierzint il mestri De André. Di autodidate, za ae etât di nûf agns, e tache a sunâ la ghitare acustiche. Dopo la sô prime esperience cul grup The Random e tache a meti dongje poesiis e scrivi cjançons. Come che e conte je «o gratâ la ghitare e o cjanti, lant daur ae me passion de musiche di De Andre».
◆ Dopo ve cognossût il Folk Club dal Joibe de Girada di Udin, cjapitaneât di  Lino Straulino, la sô passion pe musiche e cres simpri di plui, e cusì e tache a componi e presentâ lis cjançons ancje al Circolo acustico di Louis Armato.
O di bessole o acompagnade, Nicole e puarte atôr pai locâi e manifestazions dal Friûl tocs soi e cover. No cate la zovine etât, la artiste e emozione il public cun lis peraulis poetichis e pe rare intensitât e timbri de so vôs.
◆ Insiemi cun i amiis e a lôr volte zovins cjantautôrs, Alvise Nodale, Veronica Urban e Massimo Silverio e je la vôs, ghitare e armoniche dal progjet  “Storie Sbagliate”, che a partî dal Novembar 2018 al fâs tribût a Fabrizio De André. Lis vôs e struments dal cuartet si incrosin par riproponi i grancj classics e cualchi perle mancul cognossude, intun concentrât di cjançons intimis e sincîrs, che a ripuartin sul palc la umanitât des storiis sbaliadis di De André.
◆ Il 25 di Mai 2019 al jes il so prin disc di tocs inedits, dal titul  “EFFE”, che e puarte ator pal Friûl simpri acompagnade di un cuartet di zovins cjantautôrs. Lis sôs intensis baladis e poesiis a fasin emozionâ cun i colôrs de so vôs.
◆ L’an passât, Nicole si fas ancje ricognossi pe so gjenerositât. E organize un conciert par rindi un omaç a Gjenue par cjapâ su donazions pai sfolâts dal puint Morandi.  Fra tantis cjançons e cjante l’”Hallelujah” te versione di Jeff Buckley, fasint emozionâ dut il public.
Dilunc la cuarantene dal 2020 e consolide la so colaborazion cun il poli-strumentalist Leo Virgili. Al nas cusì il singul “Aspettando il Sole”, jessût su YouTube il 13 di Jugn e acompagnât di un video realizât cun i dissens di Gaia Perissutti.
Cun sperance pal gnûf an che al ven, lassìnsi traspuartâ de maraveose vôs di Nicole. Stait daûr ae artiste su lis plateformis social, tant che Facebook @nicole.coceancig, par scuvierzi i soi prossims progjets. ❚

Moira Pezzetta