La piçule comunitât di Clavaiis, intal Comun di Davâr, a 827 metris sul nivel dal mâr e poiade tal versant Ovest dal Çoncolan, e à di pôc costituît, su la fonde de Leç dal stât n. 168/2017, il propri Domini coletîf. Un ent che, midiant dal Comitât, al à l’obietîf di gjestî di bessôl il teritori de Proprietât coletive de frazion di Clavaiis.
◆ “Lis Proprietâts coletivis – al dîs Mattia Primus di Clavaiis – a son clamadis spes “Ûs Civics” ancje se no in maniere corete. Chest tiermin al è stât creât de machine burocratiche dal fassisim che e à cirût, cuntune leç ad hoc (la n. 1766 dal 1927), di eliminâ i dirits des piçulis comunitâts talianis a pro dal stât e des grandis aziendis. Par fortune, no àn rivât adore, e soredut tes zonis di mont i dirits di fruizion e di utence di chescj teritoris a son restâts a ogni singule comunitât; la comunitât, come confermât ancje de leç dal 2017 “Normis in materie di domini public” e à la pussibilitât di costituî il propri ent pe gjestion dal so teritori.”
◆ E chest al è ce che e à fat la int di Clavaiis! Cul supuart di “Alleanza Friulana Domini Collettivi”, un grup di personis vuidadis dal zovin Mattia Primus, e à rivât a costituî un Domini coletîf. Al dîs Mattia: “o speri e mi auguri che dut chest al sedi un esempli ancje par altris comunitâts!”
◆ I pas impuartants a son stâts:
• aprovazion dal regolament eletorâl (sul stamp di chel alegât ae delibere n. 207 dal 2011 de Regjon F-VJ);
• indizion des elezions par elei i membris dal Comitât frazionâl. Lis elezions a son stadis fatis ai 13 di Setembar dal 2020 tal fabricât de ex Latarie di Clavaiis; a son stâts elets Giovanni Brovedan, Marzia Pachner, Mattia Primus, Dario Puschiasis e Mirco Zanier;
• presentazion dal Statût che al è stât aprovât de Assemblee de Comunitât ai 25 di Otubar;
• dipuesit e regjistrazion dal at costitutîf.
◆ “La motivazion principâl de gjestion autonome che la int di Clavaiis e à decidût di puartâ indevant – al dîs  Matteo Primus –  e je chê de cure e de tutele dal teritori. O fevelìn di 120 etars, massime di zonis di bosc, che tai ultins agns a stan paiant un deperiment no indiferent. Di chê altre bande, la situazion no pues jessi diferente cu la gjestion in mans aes aministrazions comunâls, cun comuns simpri plui in dificoltât dal pont di viste des risorsis e dal personâl (e Davâr nol fâs ecezion, cu la vastitât dal so teritori e ben 13 frazions) e no si pues pretindi che a gjestissin tal mût miôr pussibil i teritoris, in particolâr chei boschîfs che a son dal dut bandonâts.
◆ Di fat, la Comunitât di Clavaiis e je convinte che par garantî la atenzion e la cure costante che i boscs a domandin (in particolâr vuê, dopo de burascje Vaia), la gjestion e à di jessi in man a cui che il teritori lu cognòs miôr di altris e duncje aes personis de comunitât che a àn un interès diret ae conservazion dal propri patrimoni boschîf ma ancje agricul e pastorâl. Cun di plui, cuntune gjestion atente, ancje se il marcjât dal legnam al è inmò in crisi fuarte, si puedin otignî jentradis economichis che a podaran jessi dopradis no dome par mantignî e par tutelâ il teritori, ma ancje par piçulis iniziativis e oparis te frazion, a benefici diret di dute la comunitât.” ❚

Marta Vezzi