Un jutori concret pe Crôs Rosse di Palme

Un minibus a disposizion de Crôs Rosse Taliane di Palme par rivâ adore a sigurâ i traspuarts des personis cun disabilitât. L’invistiment al è stât pussibil in graciis dal contribût de Fondazione Friuli al grup di volontaris de citadine stelade che in cheste maniere a podaran vê a disposizion un mieç che al rint plui facil il lôr lavôr a servizi de comunitât, e in particolâr pes personis cun dificoltât di deambulazion. Cui fonts de fondazion si à di fat comprât un minibus Fiat Ducato polifunzionâl.
◆ Il veicul al è stât screât ai 3 di Otubar te sede de Cri palmarine in vie Taglio, 6: a jerin presints il president de Fondazione Friuli Giuseppe Morandini, il prefet Angelo Ciuni, la dotore Tamico Nonino de Uti Agri Aquileiese, l’inzegnîr Mauro Massai e Lucia Mariani de dite Fratelli Mariani di Pistoia che e à prontât il mieç, i rapresentants des fuarcis dal ordin, i gjenitôrs dai students dal istitût scolastic La Nostra Famiglia di Pasian di Prât, e tancj sindics dal teritori.
◆ Il gnûf veicul al sarà metût al servizi de comunitât pal traspuart sanitari di pazients che a stan suntune sente a ruedis (di lôr proprietât o metude a disposizion de Cri di Palme), o par compagnâ utents che no rivin a movisi in autonomie, sedi che il servizi lu domandi la aziende sanitarie che privâts. Cun di plui, e sarà la disponibilitât a rispuindi a richiestis di traspuarts socioassistenziâi no sanitaris di bande di utents no autosuficients che a rivin ancje des cjasis di ricovar dal teritori. L’obietîf al è chel di ufrî un servizi di traspuart par personis cun disabilitâts che al puedi garantî la massime sigurece, viodût che il mieç al è omologât par podê puartâ sentis a ruedis. Il mieç al è indotât di une strumentazion adate par jevâ sù lis carocinis e ancje cun ducj i presidis sanitaris che a coventin, tant che sac di prin socors, ossigjen, e defibriladôr semiautomatic. Il gnûf minibus al sarà vuidât di personâl cualificât, abilitât a doprâ i presidis sanitaris tal câs che al ves di coventâ. ❚