In tancj – forsit ancje cui che al à la bontât di lei – a àn vût un pes ros di piçui. Salacor cence savê che considerâlu dome un complement ornamentâl no i rint par nuie merit. Lu sa dal sigûr Stefania Sarnataro che, pe “MontVert”, e à sielzût propit chest pessut origjinari de Asie orientâl, il Carassius auratus, tant che aleât preziôs pe sô ativitât insiemi ai Carassius shubunkin e aes carpis koi. I pes, di fat, a àn une part fondamentâl tal sisteme agheponic, parcè che a son la font di fertilizant naturâl pes plantis coltivadis.
◆ «I nutritîfs pes plantis a son dâts dai scarts metabolics dai pes che a contegnin amoniache – e spieghe Stefania –, i bateris le trasformin in nitrîts e altris bateris a trasformin i nitrîts in nitrâts, che a nudrissin lis plantis. De bande nestre, si preocupìn di dâur di mangjâ ben ai nestris operaris – i pes – cun mangjative naturâl a base di farine di insets».
◆ In curt, ae MontVert, cu lis verduris, si podaran cuistâ ancje i pes dal arlevament. ❚

E.A.