Zovins, informazion e politiche

(al va indevant dal numar passât)
https://www.lapatriedalfriul.org/?p=24072

… Parcè no dâ lis informazions prime, cuant che ancjemò si è a scuele, par dâ la pussibilitât po dopo di jessi autonoms e cussients tal moment dal vôt, pluitost che lassâ i zovins tal moment de maiôr etât cence la capacitât di fâ distinzion jenfri un partît o chel altri, e jenfri un program di diestre o di çampe? E no stoi fasint esemplis ingredeâts: mi è capitât che compagns di scuele a vignissin a domandâ dulà che al stave un partît o un altri, e fidaitsi che no al jere dificil di induvinâ! Almancul, in chescj câs, si domande, parcè che cuissà trops che a van ancjemò a votâ cence vê nancje une minime idee di cui elei. Simpri che si vadi, a votâ: lis ultimis indagjins a disin che tes ultimis elezions europeanis dome il 56% dal popul al va a esprimi il so pinsîr, la dì des elezions!
◆ No podìn ciert jessi maraveâts e nancje inrabiâts: cemût si puedial pretindi che i zovins si interessin de politiche viodût che 1) no ricevin informazions di base a scuele e 2) la politiche atuâl e fâs pardabon pietât, dimostrant il plui des voltis un nivel di serietât dongje di  chel di une scuele materne?
◆ Ce che mi fâs plui aviliment al è che la scuele – e duncje il lûc là che al varès di jessi formât il spirt critic di ogni individui – e reste fûr dal dut di chest dibatit, cuasi cun imbaraç.  Sì, imbaraç. Tropis voltis, in classe, si olsavial domandâ ae professoresse o al professôr la sô opinion politiche e, puntualmentri, si sintivial a rispuindi che la scuele no jere il lûc par fevelâ di chei argoments li? O crôt che i plui zovins si viodaran, purtrop, in cheste situazion.
◆ Ma jo mi domandi: ma ce isal di mâl a fevelâ di politiche? Pluitost che imparâ datis su datis di cuant che al à vivût un re roman magari nancje fondamentâl – cun dut il rispiet, ma o savìn che dopo de verifiche ducj si dismentein di chestis robis – no saressial miôr scomençâ a studiâ ce che al è sucedût te storie moderne?
Piçul inzornament par ducj chei che a scuele no van di un pôc: tal an di cuinte superiôr si rive, se e va ben, ae Vuere Frede. Jo, par esempli, o ai passât un mês a studiâ la Belle Époque, cuant che la vuere jenfri URSS e USA e je stade fate in dôs oris, e no stoi scherçant! Su chel che al è sucedût dopo, in Italie ma ancje fûr, nancje une peraule.
◆ Us lassi cuntune domande: cemût puedio vê une opinion, vuê, se no sai nuie di che che al e stât îr?  ❚