Cuant che la Storie si ripet, al diseve Carli Marx, la prime volte e je in forme di tragjedie: la seconde e devente une farse. E ancje se nol è masse ce ridi, al è chest il destin che al tocje ae vicende purtrop no masse fortunade dal dirit dai furlans a viodi la lôr lenghe doprade su la television di Stât talian, la Rai. I dâts dal Ministeri de Economie a mostrin che lôr a àn simpri paiât cul Canon salacôr cetant di pui che tante altre int ator pe Italie: ma fin cumò i abitants di cheste Regjon a àn podût gjoldi di un grum di oris su Rai 3 bis dedicadis aes trasmissions par sloven, intant che il furlan invezit al à simpri vût dome i fruçons.
◆ Intai ultims mês nus vevin contât che e jere daûr a rivâ une gnove Convenzion tra Guvier talian e Rai par ricognossi ancje ai furlans une presince significative de lôr lenghe intal servizi public. E ai 24 di Setembar in sale Ajace a Udin e je stade convocade la stampe par dâ cont des gnovis sul teme: considerant la presince di cetantis autoritâts, l’incuintri al prometeve une rivoluzion, ma a ben viodi la “surisute” che e je stade parturide e je un sucès dome pe Rai.
◆ Al sarà difat un stanziament di 550 mil euros in plui dai 200 mil che za a vignivin paiâts fin cumò: il Stât quindi al paiarà cuasi il tripli, ma par vê ce? Par permeti la produzion di 16,5 oris (e la difusion di 28 intun an) di trasmissions televisivis e la produzion di 17,5 oris (e la difusion di 30 intun an) di trasmissions radiofonichis in plui di ce che al ven fat cumò. La grande gjonde des autoritâts e je dut câs pardabon incomprensibil, se si pense che la Rai no à individuade inte sô sede furlane nissune struture che e pues produsi trasmissions televisivis e cuindi e scugnarà cjoli al di fûr prodots multimediâi invezit di pensâ a realizâju. E se la radio e cressarà di 90 a 120 oris di difusion, ven a stai dal 33%, la spese publiche invezit si sglonfarà dal 275%. Un biel afâr pe Rai, cheste firme di un assegn in blanc che al dà fûr bêçs cence nancje previodi nissune penâl in câs di mancjade realizazion di chescj dovês contratuâi.
◆ No dome: di nissune bande si fevele dai vêrs pas indevant che a saressin chei di une redazion giornalistiche che e sedi bune di meti in vore un gjornâl radio o un telegjornâl par furlan, o di une struture produtive interne che e sedi dedicade a produsi dome i materiâi in marilenghe che a laressin indreçâts al public. Il rest a son dutis fufignis e garabatulis: ancje parcè che chest at integratîf al à une durade di 7 mês, intant che e vignarà stipulade une gnove Convenzion che e podares cambiâ dut ma che no somee dut câs jessi une prioritât, soredut pe Rai. Che culì in Friûl e à cjatât une gnove vacje di molzi, e viodût che e à vût un premi di 550 mîl euros in plui inte sachete, e continuarà cun dute probabilitât a dimostrâ la stesse atenzion che e à riservât fin cumò ae marilenghe: ven a stai, nissune. ❚
