Sfuei Mensîl Furlan Indipendent
Archivi de Patrie

Avost, anìn in ufici … a Lignan

Bete Di Spere

Il mês di Avost al è par solit dedicât aes feriis, o ben a chês setemanis li che i furlans a fermin di lavorâ tal ufici o in fabriche e a tachin a lavorâ a cjase.
Ancje la industrie dal turisim regjonâl si è justade intor di cheste vocazion par fâ sintî mancul fûr di puest il furlan in vacance: no par nuie Lignan al è l’unic puest di mâr dulà che i stabiliments balneârs si clamin “uficis”.
Ancje ai nestris letôrs, duncje, ur augurìn buinis feriis: no stait a fâ masse fature.
I sants dal mês
San Dul, protetôr dai pîts frescs di Istât.
◆ San Dul cul cjalçut, protetôr dai mucs a Lignan.
◆ Ai 26 di Avost, Sant Sandri, che a dîle dute nol meretave nancje di jessi sant: il Pape in chel dì al voleve dome clamâlu par non, ma al veve il sangloç e il salût al è vignût fûr mâl: “Mandi Sand-Sandri!”.
◆ Cuant che i fedêi a àn scomençât a preâlu e a aclamâlu, il Pape no si è sintût di dî che al jere dut un malintindiment.
Il proverbi dal mês
Il zovin al cor, ma il vecjo al sa la strade par daûr par no fâsi becâ dal alcoltest.
Il meteo di Avost
Tal mês di Avost il timp al sarà biel, cun temperaduris cjaldis ma cence scjafoiaç, un biel frescut di sere, soreli vie pal dì cun cualchi nûl juste par rinfrescjâ cuant che al covente.
Cîl net che tu puedis viodi Lignan stant parsore dal Colians, ancje se al è il Çoncolan tal mieç*
* Cheste prevision meteo e je sponsorizade de aziende turistiche regjonâl.
Afidabilitât: come “fasìn dome un zîr di tais e dopo vonde”
La bestie dal mês
Il moscjit de Basse. A diference di chei altris moscjits, che a bechin dome tor dal tramont e in chês altris oris a stan in polse, il moscjit de Basse al è furlan e nol polse mai. Par tignîlu lontan, l’Autan o i zampirons no coventin: provait invezit a sborfâju cul vin Teran. Forsit, sintint odôr di triestin, il moscjit de Basse al scjampe vie.
Avost te storie
Ai 8 di Avost dal 1977 une leç e istituìs la Universitât di Udin, cu lis facoltâts di Matematiche, Agrarie e Architeture che, par slargjâ i iscrits, a jerin stadis rinomenadis “fâ di cont”, “lavorâ tal ort” e “modon”. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +