I PROTAGONISCJ – Il legjislatôr che al regalà ai furlans la lôr Costituzion

Cuant che il patriarcje Marquart di Randeck al rive in Friûl, al cjate lis robis de Glesie di Aquilee dutis sotsore, sedi pes vueris capitadis prime di lui, sedi par sdavassarie di cualchidun. Il prin obietîf dal patriarcje al è chel di recuperâ tieris e cjistiei usurpâts, ma ancje afits, dirits e tassis sui cjamps, cjasis, mulins, puints, aghis e dut ce che al pues puartâ jentradis ae casse de Patrie. Al covente alore cjapâ in man lis cjartis antighis, i regjistris, lis invistiduris, insome ducj i ats dai ultins secui che a dimostrin i dirits dai patriarcjis. E je une vore mostre, ma Marquart al à la fortune di vê un cancelîr straordenari, Durì di Susane.
Cun competence e precision e cun agns di lavôr, il segretari al bute jù un bocognon di libri cu la liste di ducj i dirits dal patriarcjât. Chest imprest, che al veve di jessi dome un regjistri economic, al devente invezit di fat tant che une vere storie, dulà che al ven fûr, cui documents, dute la grandece de Patrie. Il libron al vignarà finît di so fi Zuan e, cu lis cjartis origjinâls, metût intune casse di fier te sagristie dal domo. Cuant che, tal 1420, i venezians a concuistin la Patrie, la casse e ven puartade in cjistiel, tal ufici dal lutignint venit. Dopo e va a finî a Vignesie, là che e va pierdude intun incendi. Graciant Idiu (ma no i venezians), nus à restade cualchi copie fate dai furlans prime de “sparizion” veneziane.
Marquart, patriarcje di Aquilee dal 1365 ae sô muart tal 1381, al è un diplomatic fin e om fidât dal imperadôr e, tal stes timp, al rive a mantignî bogns rapuarts cul pape. Al puarte a bon une vore di missions di pâs e di vuere par cont dal imperi e, tal stes timp, al rive a infuartî il patriarcjât e a recuperâ tieris e citâts, tant che Tulmin, Vençon e Triest. Al è ancjemò ricuardât in Friûl par vie de Messe dal spadon di Cividât, tacade cun lui. Ma une altre grande opare di Marquart e je la codificazion di dutis lis leçs tes “Costituzions de Patrie dal Friûl”, une des costituzions plui antighis, metude adun di une comission parlamentâr e promulgade dal patriarcje te sentate dal Parlament dai 8 di Novembar dal 1366 a Sacîl. Lis “Costituzions Marquardins” vie pai secui a saran la fonde dal dirit furlan. ❚