Une schirie di events par no dismenteâ il presit de dignitât

Trop valie la dignitât di un om, di une famee, di une comunitât interie? Mai avonde, cuant che lis lôr vitis a son pedinis di trê braçs e un franc inte scachiere dal podê. Mai masse pôc, cuant che chei braçs si metin adun par dâi cuintri a un destin imponût e a batin mans e pîts pai lôr dirits e par garantîsi un lavôr, une paie, alc te cite par cene. Ve che alore gnove fuarce e spissule dai dêts grumbulôs e il sanc spudât a balins si mude in linfe vitâl. O in aghe, come che al sucedè inte Basse Furlane 70 agns indaûr intes “Lotis dal Cormôr”, cuant che un trop di “sotans” si organizà par fâ sù in autonomie chel canâl sul Cormôr che il Guvier ur veve dineât e che al varès garantît un avignî diferent pai fîs di chês tieris pantanosis. Aben che scombatût de polizie, chest maraveôs siopar par ledrôs – a dimostrâ inmò une volte che il furlan nol proteste dibant e che la sô contestazion e à di jessi at costrutîf – al cjatà la poie di sindics e plevans, in plui di stiçâ il pinsîr di inteletuâi e artiscj che a fermarin lis pagjinis di chei dîs e a zovarin a dâi un profîl a tancj di chei “cence storie”.
◆ Propit cul intindiment di no dismenteâ chei events, la Associazion Artetica e la Sezion ANPI “Premoli” a àn inmaneade une schirie di iniziativis vie pal 2020, cul patrocini dai comuns di Palaçûl, Muçane, Cjasteons di Strade, Prissinins, Roncjis, San Zorç di Noiâr, Çarvignan e Cjarlins, in colaborazion cul Dipartiment dai Studis umanistics e dal patrimoni culturâl e dal Centri Interdipartimentâl pal svilup de lenghe e de culture dal Friûl (CIRF) de Universitât dal Friûl, ANPI di Udin, Istitût Furlan pe Storie dal Moviment di Liberazion, CGIL di Udin, AUSER provinciâl e “Turgnano”, cun Primacassa F-VJ tant che sponsor e Radio Onde Furlane tant che media partner.
Par une setemane, a tacâ dai 19 di Mai, date di inizi des “Lotis”, su la plateforme online adessocinema.it si à podût viodi il documentari “Le lotte del Cormôr” (2010) di Adriano Venturini e Lorenzo Fabbro. Daspò dal Istât, e vignarà prontade une trasmission radiofoniche par cure di Renato Rinaldi, Andrea Collavino e Aida Talliente, intant che un altri progjet, in plui dal sît internet, al è chel di cjapâ sù i contribûts di diviers artiscj di vuê, intune sorte di spieli di ce che al jere sucedût tai agns Cincuante. Tor la fin dal an e vignarà inmaneade une cunvigne in Universitât. Par memoreâ ma soredut par passâ il testemoni de memorie aes gjenerazions plui zovinis. ❚ (S.F.)