I PROTAGONISCJ – Princip just e vescul pari: par chest Bertrand di Saint-Genies al fo libar di scugnî murî

Ai 6 di Jugn dal 1350, tai prâts de Richinvelde al fo copât il Patriarcje di Aquilee Bertrand de Saint-Geniès, pai furlans Beltram. In che dì, al murive un princip just e imparziâl, studiât e savi, ardît e vitoriôs, che al jere ancje un vescul devot e vivarôs, un pastôr sevêr ma cul afiet di pari, amât e riverît, premurôs e bon.
◆ Ma chê dì de sô muart no je stade dome il sierâsi di une vite fûr dal ordenari, ma la dies natalis, la dì de nassite te vite dai sants. Beltram, ancje in gracie di cheste muart insanganade, al è memoreât fin in dì di vuê tant che Beât di invocâ tes fadiis de vite, e massime tes dificoltâts de Patrie dal Friûl.
◆ Une vore a son chei che, vie pai secui, a àn scrit di lui, par fevelâ de sô vite. Un segn e une prove dal amôr di Beltram pal Friûl e pai furlans. Il patriarcje, di fat, al è un spieli valit in ogni timp, ancje ore presint, massime  pai politics e pai pastôrs.
◆ Te plui part des biografiis si fevele che il cuarp dal puar Beltram al rivà a Udin suntun cjar compagnât di dôs prostitudis. Te conte achì dongje, o provi a dâ un sens uman a chê che al somee dome un insult a chel grant om e beât che, di 670 agns, al polse intun altâr dal domo di Udin. Di là nus clame dongje ancje vuê a cjalâ e a lâ daûr de sô antighe bandiere turchine cu la acuile de Patrie. ❚ (D.N.)