✽✽ E se il senari al fos cambiât a colp? Se dut ce che o vevin previodût, analizât e in cualchi câs vût pôre che al sucedès, al ves mudât dal moment colôr e dimension? Scomencìn a fâsi une reson, preparìnsi a un cambi di strategjie.
✽✽ Fin a trê mês indaûr, e jere opinion comune che il destin de Regjon F-VJ al dipendès dal disvilup fissât e aromai definît di Triest e de sô aree, cun cualchi vantaç residuâl pal Friûl, destinât a fâ di tiere indentri al “fenomen” julian.
✽✽ Dut al contribuive a creâ cheste convinzion: il pês dal puart e la determinazion cinese di fânt un terminâl de vie de sede, il simpri plui grant ricognossiment internazionâl ae Citât de sience, il fenomen turistic leât al mont des croseris, la citât viodude tant che sede ideâl di congrès e di cunvignis, il disvilup edilizi e dai servizis peât a chestis prospetivis. A fâ di curnîs a cheste vision e restave dut câs la imagjin di un Triest talianon, riferiment di une concezion patriotiche e nazionaliste, chê che e torne di continui a vignî sù cuintri dal mont slâf “barbar”.
✽✽ Il Friûl in chest contest si interogave sul so rûl futûr, confondût tra la ipotesi di deventâ dome un furnidôr di lavoranzie, di un spetatôr che al paie in tiermins di cressite economiche e di pês politic mancjâts, o dome comprimari cence dirit di vôt intune regjon aromai a vuide uniche. I solits sotans, i ascars ben paiâts des associazions di categorie, dai sindicâts, dai partîts, “diestre e çampe unîts inte lote”, a cjalavin la Operazion Alabarde cu la ande di cui che al è bon di dut, baste mantignî cualchi presidence – pardon, cualchi vicepresidence -, intai conseis di aministrazion dai agns a vignî.
✽✽ L’autonomisim di cjase nestre al jere cussient dal pericul che al coreve dut il Friûl, di Gurize a Pordenon, passant pe decressite infelice di Udin. Devant di chest cuadri, nol restave che cirî di limitâ i dams, evitant une sdrumade fatâl, difindint il plui pussibil spazis e prospetivis di disvilup, riclamant un ecuilibri intai rapuarts di fuarce che inte pratiche al steve za finint di esisti, cuntun centralisim regjonâl simpri plui arogant, prepotent, che al evidenziave cun clarece lis sôs sieltis di cjamp.
✽✽ Dopo, il virus, come un outsider capriçôs, al à cambiât dut, tacant dal pês de Republiche Cinese intal panorame internazionâl, metint in forsit i siei programs di disvilup, massime intal setôr logjistic e dai traspuarts. Al è lât indevant dopo incagnintsi cuintri dal turisim, in particolâr chel des croseris e, cu lis disposizions di distanziament fisic, cuintri chel des cunvignis e dai grancj events: fin che no si scuvierzarà la vacine, dut al reste indefinît e sospindût, tant che lis pleis che al cjaparà il mont gnûf. Un colp no di pôc pe capitâl regjonâl.
✽✽ Ce che duncje al someave cuasi scontât intai rapuarts di fuarce e di interès tra Friûl e Triest, il pês des componentis regjonâls, il rûl stes che a varan di vê i furlans intal dopo epidemie si zuie in chest timp di spiete, dulà che cui che al olse di plui, cui che al à progjets di futûr sostignibil, cui che al pense che il ben comun nol sedi un sproc di condomini ma un invistiment pussibil e reâl, al zuie lis sôs cjartis.
Il Covid 19 al pues risultâ ancje l’as di briscule. ❚
Dree Valcic
