Franz Candoni e la sô musiche di sperance
Scuvierzìn insiemi un zovin cjantautôr furlan di grant talent, che in chescj dîs di isolament sociâl nus fâs insumiâ e nus puarte sperance cu la sô musiche.
◆ Francesco Candoni, in art Franz Candoni, al è un musicist di Udin. Cu la sô vôs e cu la sô ghitare al trasforme in melodie lis poesiis e i tescj che al compon. Al puarte adalt il non di tancj altris grancj compositôrs talians.
◆ In zoventût al à colaborât cui doi grups Masso dei Rei e Mantra Market, e cun lôr si è esibît ator par Udin e al à publicât diviers albums. Dai 2017 si presente al public tant che cjantautôr.
◆ Al scrîf doi albums, “Via Lattea n. 28” tal 2014 e “Immagina di essere felice” tal 2018, e tantis cjançons singulis come “E’ tornata primavera” e “Tanema”, che e puarte tal titul il non di cheste lenghe oceaniche cuasi estinte.
◆ “E andrà tutto bene/ tutto andrà bene/ torneremo a giocare e a ridere insieme/ andrà tutto bene come ai battesimi e ai matrimoni/ alle cene di gala e alle comunioni” al è il ritornel di chescj dîs di cuarantene. Ta cheste cjançon dal titul “Mediterraneo”, jessude intal Jugn dal 2019, Franz al à anticipât lis sensazions di solitudin e di distacament sociâl che o vivìn cumò. Il toc al fevele di sperance, e di cemût che dopo dal burlaç al tornarà il soreli. Tal video, Franz nus puarte su la splaze di Grau.
◆ Il singul al è une des cjançons che, insiemi cu la brilante cjantante Marica, Franz al à proponût sui siei canâi social in chescj dîs di isolament. Come lui, tancj altris artiscj furlans a doprin l’hashtag #cjantincjase e a fasin diretis video cjantant e sunant.
◆ Ancje se di cjase, Marica e Franz a cirin di iluminâ lis zornadis di ducj chei che a son obleâts a stâ sierâts tra lis parêts. «Par nô, al è un mût di distraisi dilunc de zornade, e o sperìn di regalâ un pocje di ligrie e di distrazion a cui che nus scolte».
◆ O sin sigûrs che Franz e Marica a stedin profitant di cheste parentesi par riviodi il lôr repertori, magari creant gnovis cjançons. Cuissà. Al è sempliç scuvierzilu, baste stâi daûr a Franz Candoni su lis plateformis social, su Youtube e Spotify e cjantâ cun lui. ❚
