Campionesse taliane tal 2018, cun cjâf,
passion e determinazion

Cjapâ part a une ultramaratone al vûl dî cori par plui di 42,195 chilometris, chei de maratone classiche par capîsi, ancje une zornade interie di file o plui, cualchi volte di rive sù e di rive jù, frontant la fature, la strache dal cuarp e dal cjâf. Une gare estreme che la udinese Elena Fabiani e cognòs benon, fuarte di un titul talian assolût e tantis altris afermazions che a vegnin di une passion, grandonone, nassude par câs, che le à puartade ancje a vistî la maie de nazionâl taliane di ultramaratone di 24 oris.
◆ Elena, tesserade par Woman Triathlon - scuadre di Verone fate dute di feminis -, e fâs la farmaciste: 43 agns, mame di une frute, e cor dome dal 2013, ma daurman e à fat viodi un talent naturâl che le à puartade a vinci o a vê biei plaçaments in cetantis garis. «Cuant che siet agns indaûr, sot Pasche, o ai savût che la pissine li che o levi ogni dì e sarès stade sierade par trê dîs, o ai tacât a cori. O ai vût grancj infortunis - e conte la ultramaratonete furlane -, ma mi soi apassionade di subit. La mê prime gare le ai fate pôcs mês daspò, in Jugn, cun amîs. E jere une mieze maratone: 21 chilometris in Ongjarie. Po e je stade la maratone di Vignesie: o soi rivade decime tierce tra lis feminis, cuntun bon timp. Planc a planc mi soi svicinade ae ultramaratone, la gare juste par me, che o soi competitive e o ai gust di cori. Cuant che tu slungjis la distance, la tension e cale. Tu te cjapis plui comude, tant che tu fasessis un viaç».
◆ E ta chest viaç - «cun te stes e cuintri di te stes» -, il cjâf al è pardabon determinant. “Se tu vuelis lâ svelt, cor di bessôl. Par lâ lontan, fasilu cun cualchidun”, e dîs une detule africane. La esperience di Elena e je une conferme di chest. «Par preparâsi cul cjâf a une gare, cualchidun al fâs yoga o meditazion… jo no dopri tecnichis particolârs, però tai moments dificii - e a ‘nd è intune ultramaratone -, in plui che ai conseis e al sostegn dal gno alenadôr e di mê fie tes garis plui curtis, mi jude cori e fevelâ cun altris atletis, che ti dan la fuarce di lâ indevant se no tu je fasis plui. Ur sucedarà ancje a lôr di vê crisis e alore o sarai jo a judâlis, a judâju. Intune gare di corse tant lungje, su circuit, no si è mai bessôi e a nassin amiciziis cetant bielis».
◆ La corse, di fat, e je ancje amicizie. Cussì, «cui amîs, invezit di lâ a cjoli un cafè o un aperitîf, dispès o voi a cori. La joibe di matine, prime de emergjence sanitarie causade dal coronavirus, si cjatavisi aes 5.20 intun biel trop a Glemone, li de stazion, par lâ a cori in mont, su la siele di Sante Agnês. Aes 7 o vevin finît. E po vie a vore». La organizazion par un ultramaratonete e je fondamentâl par rivâ a conciliâ la pratiche di chest sport cun lavôr e famee. Elena e cor ogni dì - la matine a buinore prime di lâ in farmacie - une ore e un cuart, une ore e mieze, cun cualsisei timp: ploie, soreli, aiar o nêf. E par frontâ une gare impegnative, «o fâs alenaments di 20/30 chilometris e cualchi gare, ma no lungjis tant che chê obietîf. Prime dal Covid-19, o fasevi une gare al mês, aprofitant cussì di viazâ. Tai ultins agns lis mês vacancis a son stadis peadis propit ae corse».
◆ Cui che al cor, massime su lis distancis de ultramaratone, lu fâs par passion, pe gjonde di scuvierzi gnûfs orizonts, no dal sigûr par deventâ siôr. «La nazionâl e interven su lis garis uficiâls, che a son une o dôs ad an. Pal rest, o rientri un pôc su lis spesis in gracie di doi sponsors che mi furnissin ancje i articui che mi coventin».
Fevelant di obietîfs, il prossim al è la nazionâl di 24 oris. E duncje - misuris anti Covid-19 permetint -, la pussibilitât pe atlete furlane di fâ un altri european (dopo chel dal 2018 a Timisoara, in Romanie) o mondiâl, rivant a svintulâ di gnûf la bandiere dal Friûl tant che e à fat l’an passât a Barcelone. «Al è stât une vore biel - e ricuarde la ultramaratonete -, in tancj mi àn domandât il so significât». E tant che gare, il sium di Elena al è chel di fâ la Ultrabalaton, il zîr dal plui grant lât european, il Balaton juste apont. Di passe 200 chilometris. Mancul innomenade e publicizade di altris garis, ma une vore sugjestive.
◆ Il timp al è. «La ultramaratone e je une corse avonde lente, che ti consume, ma che tu puedis fâ ancje a passe 50 agns. E la maturitât, ta cheste dissipline sportive, ti jude. Te nazionâl taliane feminîl, la etât medie des atletis e je di 43/45 agns, tal forest si sbasse, ma no di tant. I vûl cjâf e determinazion, che par solit a vegnin cul lâ indevant dai agns». E jessi femine al jude. «Su lis distancis curtis, i mascjos nus dan il fum, parcè che a àn une potence muscolâr superiôr ae nestre, ma plui si slungjin lis distancis, plui il gap om-femine si ridûs, parcè che il cjâf al conte di plui e, a nivel di cjâf, lis feminis a son plui fuartis, a rivin a tignî plui dûr». ❚
Erika Adami