TERITORI – SLOVENIE. Vin o bire? in Slovenie cualitât sigurade

Cui che i plâs bevi ben al sa che in Slovenie al pues sodisfâ ducj (o cuasi…) i siei desideris… Ancje se tal paîs nestri vicin a vegnin imbutiliadis aghis cetant utilis pe salût, e cun di plui nol è dificil cjatâ la cussì clamade «aghe clope» che e odore di ûf frait ma che e zove no pôc al fiât, in Slovenie, de cueste fintremai al confin cun Austrie e Ongjarie, si cjate simpri in ogni gostilna «un tai di chel bon». Ogni an i vignâi slovens a regalin uns cent milions di litris di vin: un milion di etolitris che a vegnin fûr des trê zonis di produzion, vâl a dî il Podravje (di là dal flum Drave, dongje de Ongjarie), il Posavje (di là dal flum Save, tal mieç dal paîs) e la Primorska (ven a stâi il Litorâl, des Alps fin al mâr Adriatic).
DESENIS DI CUALITÂTS_Al sarès dibant fâ culì une liste complete di ducj i vins produsûts in Slovenie, li che si tegnin uns 50 difarentis cualitâts di vît. No mancjin i vins tipics, di ricuardâ par fuarce. Tachìn par esempli cul Teran dal Cjars (Kraški teran), vin ros di buine schene; po e je la Malvasie (Malvazija), vin blanc che si prodûs tai trê comuns de cueste, Cjaudistrie/Koper/Capodistria, Isule/Izola/Isola, Piran/Pirano; invezit il Zelen al è un vin di colôr zâl-vert de vâl dal Vipac. Po o vin il Traminer (Traminec), vin blanc de Štajerska, e il Cvicˇek, tipic dal Posavje e de Dolenjska: si fâs cuntun miscliç di uis blancjis e rossis, al è un tic garp ma pluitost lizêr. In dut il paîs a son po sù po jù 24 mil i etars coltivâts a vît.
40 LITRIS_Lant daûr des statistichis, i slovens a bevin ogni an 40 litris di vin par om ma ancje 40 litris di bire: une cuistion no di pôc, par vie che un sloven su nûf al à problemis di alcolisim.
Za tal 1825 e vierzè la prime birarie a Laško, mintri che a Lubiane la Union e tacà a imbutiliâ tal 1864: une lungje storie e une concorince che a van indenant ancjemò in dì di vuê.
LA VÎT PLUI ANTIGHE DAL MONT_Se la capitâl Lubiane e je stade ricognossude tant che «citât dal vin e de vît», a Maribor a son sigûrs di vê la vît plui antighe di dut il mont cui siei passe 400 agns, tant che tal 2004 l’innomenât Guinness dai primâts al à decidût di cjapâ la cjosse in peraule (dut câs dopo di une schirie di esams al microscopi). O stin fevelant de vît te foto chi in bande, che e cres su la façade di une cjase tal cuartîr Lent, dilunc dal flum Drave. Al è pardabon un model pe citât cjâflûc de Štajerska, la cussì clamade Stirie slovene: di cheste vît vecjone al partìs dut un labirint di «trois dal vin» che si sprolungjin su lis culinis daûr di Maribor. Par fiestezâ ogni an cheste Stara trta e ven inmaneade une schirie di manifestazions cul titul di «De vît al vin», che si siere cul grant «Abraç ae vît antighe»: pardabon un segn di afiet viers une amie che di secui e compagne la vite dal popul sloven.
ALESSIO POTOCCO