Dopo la denunzie di Dree Venier su “La Patrie”, FVG Strade nus à fat vê chestis riis che o publichìn vulintîr. O vevin reson e il fal al sarà comedât
FVG Strade, za dal 2016, e à scomençât a instalâ la gnove segnaletiche stradâl ancje in lenghe furlane intai comuns delimitâts intal ambit furlanofon su la fonde de leç 482/99 – al sclarìs il President di FVG Strade Raffaele Fantelli -. In ogni câs, fin pocjis setemanis fa, cheste azion e jere in cualchi mût limitade di une norme che e lassave spazi a diviersis interpretazions. Cumò chest probleme – in graciis di une azion comune di FVG Strade e ARLeF – Agjenzie Regjonâl pe Lenghe furlane – al è stât risolt de gnove riforme de leç su la lenghe furlane, la L.R. 20/2019, jentrade in vore ai 21 di Novembar dal 2019. Duncje, di vuê FVG Strade, cence plui nissun dubi interpretatîf, e instalarà su ducj i lavôrs di gnove costruzion la segnaletiche stradâl bilengâl; e chest ancje su la rêt di competence, in concomitance cu lis sostituzions in câs di segnaletiche degradade e vecje. Tant che societât, o vin za prontade une circolâr interne cun cheste diretive, insiemi cuntune mape gjeografiche che e individue in dutis lis zonis de Regjon Friûl-Vignesie Julie la lenghe minoritarie tutelade di meti inte segnaletiche stradâl rispetive (lenghe furlane, furlane e slovene, furlane e todescje, furlane slovene e todescje, e lenghe slovene). Dut chest al puartarà a une incressite di coscj che a varan di cjatâ lis justis cuviertiduris economichis. In virtût di chestis modificazions resintis e dal fat che cualchi ativitât che e tocje la variante di Dignan e je ancjemò vierte – al conclût il President Fantelli – la segnaletiche stradâl di chê opare e sarà modificade metint dentri ancje la lenghe furlane”. ❚
