Silvia Stefanelli ae conference mondiâl sui cambiaments climatics a Katowice, in Polonie, tal 2018

Di neri o blanc, il tai al devente vert. No par vie de inzegnarie gjenetiche, ma in gracie di une iniziative che di cualchi an si fâs ancje a Udin tant che in altris passe 600 citâts in dut il mont. Merit di Silvia Stefanelli che e à puartât in regjon i Green Drinks: une plateforme di discussion su temis ambientâi e leâts ae sostignibilitât locâl, vierte a ducj e no leade a nissun partît. La formule e je semplice: si fevele, cence formalitâts, di temis ambientâls devant di un tai o di un altri aperitîf.

«Green Drinks Udin al nas tal 2012 cun chê di meti dongje personis che a fasin amicizie e a inviin relazions cjacarant di ambient in maniere costrutive, cence alçâ la vôs o barufâ - e spieghe Silvia, che e modere lis discussions -. Al è un mût diferent di fevelâ di ambient, di low carbon economy e sostignibilitât dulà che nissun al insegne a chei altris, ma ducj a puedin esprimi lis propriis opinions o fâsint une. No dome. La idee - e sclarìs - e je che ducj a vegnin vie dal singul event responsabilizâts, cussients di podê fâ alc par cambiâ in miôr lis robis e savint ce fâ: nol è dut in man a di chei altris, ancje une azion individuâl e à une sô influence», e dîs la fondadore dal Green Drinks Udin.

Cumò che e je tornade in Patrie, Stefanelli (che a Bruxelles e à partecipât aes discussions dal grup locâl) e varès gust di tornâ a inviâ lis iniziativis a Udin, rinfuarcint il leam cu la realtât dal teritori oltri che te sielte des cuistions di resonâi parsore, ancje elaborant propuestis, magari in colaborazion cun altris grups e sogjets. Insumis, pensâ globâl (cuâl teme isal cumò plui globâl di chei ambientâl e climatic?), ma agjî locâl! ❚

Erika Adami