La trame di un zâl intrigôs che si davuelç te suaze
dal Concili di Cividât, dulà che si cirive di ricomponi
lis divisions di une Glesie slambrade dal schisme
Pentecostis dal 1409: la zornade di scree dal Concili ecumenic di Cividât si siere cu la dolce gubane. Nuie mancul che 72 a son stadis lis puartadis di chest gustâ di gale. Pape Grivôr XII, che al à inmaneât chest concili e che al è usât a chês sbultricadis, al à preseât une vore chê buine torte rodolade a cai. Di dut chel ben di Diu, i à plasude ancje la trute delicade dal Nadison e la la spongje slave. Al à te tace Ramandul di Torlan, deliziôs, ma al à cerçât ancje la Ribuele di Rosacis, il Refosc di Albane e il Cividin. Dongje il gustâ, processions, musiche, bandieris, ligrie. Une fiestone!
Ma Grivôr nol è content. Al concili a son vignûts masse pôcs vescui e l’avignî al è ingredeât. Pape Grivôr al sa che in chel moment a son trê papis e non si sa ben cui che al è il pape vêr, cui l’antipape e cui l’antipape dal antipape: e ducj i trê a pretindin di jessi chel uficiâl. I cristians si son dividûts za di 30 agns, cuant che i gardenâi a àn elet doi papis: un a Avignon e un a Rome. Cumò in France al è pape Benedet XIII e a Rome lui, Grivôr XII. Ma chest an, par sierâ la cuistion vergognose, i gardenâi si son cjatâts in concili a Pise. E, magari cussì no, a àn nomenât un tierç pape, Alessandri V, imberdeant ancjemò di plui l’afâr. Lui al à clamât dongje i vescui in concili a Cividât propit par meti adun la Glesie slambrade di chel schisme, e la prime session des voris le à za convocade pe fieste dal Corpus Domini ma si è za inacuart che il so progjet al è partît cul pît ledrôs.
Cualchi setemane dopo, ai 8 di Setembar sot sere, Pape Grivôr, sentât suntune bancjute cun intor lis viestis dal so segretari, al pense cidin: la curint svelte e frescje dal Var e il sbordon dal barcjarûl a sburtin la patane a ponte cuadre fin dentri tal Tiliment. Lui nol rive a vê pâs: “O ai salve la vite parcè che o ai fat vistî di pape il gno confessôr: lu àn pestât a sanc e butât tal flum. Saraial inneât? Mi soi salvât travistît, cun cuatri gardenâi, des sgrifis dai Savorgnans saltant sù su cheste batele che mi spietave a Belgrât, ma o ai pierdût dut: fats presonîrs chei altris vescui, robade dute la mê robe, la arzentarie, almancul 60 mil ducâts di valôr. O ai cirût di meti dongje la Glesie dividude e di restâ pape, ancje par protezi chei de mê famee, e o ai falât ben e no mâl. I parincj mi àn ruvinât. No vevi di nomenâ gardenâi i doi nevôts! No vevi di jemplâ di parincj dutis lis incarghis de glesie là che si messedin bêçs! No vevi di butâ jù di patriarcje di Aquilee Antoni Panciera, furlan sclet, par meti tal so puest il gno Antoni Da Ponte! Panciera nol à molade la sente; Udin, i Savorgnans e scuasit dut il Friûl a son restâts cun lui, e cumò me à tornade e mi à dât pan e salam! E dopo, o ai falât a acetâ la disponibilitât di Cividât a tignî il concili. O vevi di capî che al jere dome par jessi contrari di Udin, e che nancje i conts di Gurize a saressin rivâts a garantî la sigurece cuintri dal patriarcje e de plui part dai furlans. Vuê le ai mocade dome parcè che o soi scjampât di scuindon prime dal cricâ dal dì”.
Intant di chel batibui di pinsîrs, la patane e rive ae glesie di Sante Marie di Bevaçane, su la rive dal flum. Dopo, cuntune batele maranese, il pape al va sù pal canâl fin dongje Maran, dulà che lu spietin dôs galeris mandadis di pueste di Ladislau re di Napoli, unic ancjemò fedêl a Grivôr, e al cjape il mâr.
Se te patane sul Tiliment il pinsîr di Grivôr al jere salvâ la scusse, cumò, al sigûr tal mieç dal mâr, al podeve rifleti cun calme su chê esperience furlane. Se al tornave cul pinsîr ai intervents dal clericât aquileiês, di ducj e vignive fûr salde une musiche di fonts. Lis peraulis di riferiment a jerin: Jone, Alessandrie, Cromazi, Rufin, il “Credo” diferent, i Trê Cjapitui, la liturgjie patriarchine diferente di chê romane… “Ogni ocasion e jere buine – al sbroche il pape – par marcâ che la Glesie di Aquilee e jere stade o contrarie o diferente di chê di Rome. E no son dome teoriis di bonsignôrs studiâts ma ancje tal popul si nase chê musiche: sedi cun chel lengaç che nol è ni latin, ni sclâf, ni todesc, sedi cun chel scampanotâ a fieste ogni sabide sere, e dutis chês usancis stranis”. La sô cruzie e je che lui, venezian, al à studiât i paris di Aquilee ma no si è inacuart de braùre dai furlans di jessi diferents. E il simbul che al impersone chescj sintiments al è juste apont il patriarcje, chel che propite lui al à butât jù. Ce capele!”
In chel, Modesto “anguèla” al pee la barcje dongje de puarte di Maran e al tache a berlâ ai pescjadôrs che a comedin lis rêts: “Scoltème, ancùo go portò el PAPA su la me batela! Propio el PAPA!”. E chei: “E ti te gà bevuo duto el vin de messa, vero?” ❚
