Tant che tiere dal bon mangjâ e dal bevi di gale al è naturâl che il Friûl al vedi di metisi dongje a altris realtâts li che la mangjative e je une robe serie. Al è chel che e à volût fâ la associazion Friuli Futuro, che tune serade de fin di Avost, li dal Kursaal di Lignan Pinede, e à inmaneât un incuintri par fevelâ dai segrets de taule dal comissari Salvo Montalbano, innomenât personaç in gracie dai libris di Andrea Camilleri prime e po de intepretazion di Luca Zingaretti par television. Stant che il bon mangjâ e bevi no àn confins, la sale dal Kursaal e jere straplene, ancje par vie che nissun al à volût mancjâ ae ocasion par cerçâ prodots di lenti vie: une sorte di zimulaç Friûl-Sicilie lu si è vût midiant di une recipe dal scaletîr sicilian Giuseppe Gangi che di agns al lavore a Udin, prontant arancins cun persut di Sant Denêl e foncs al puest di purcit e vidiel, il dut compagnât di vin blanc furlan.
Dilunc de serade, inmaneade dutun cul jutori de Regjon, de Bancje di Cividât, dal comun di Lignan e de Società Imprese Lignano, al è stât presentât il libri di Stefania Campo «I segreti della tavola di Montalbano», li che si cjatin lis 60 recipis de mangjative dal comissari (che i plâs bevi cafè e whisky) tai 19 libris che Camilleri i à dedicât. A fâ dâ des bielis ridadis al public fevelant di vizis e virtûts dai sicilians il cabaretist Sasà Salvaggio, che al à ricuardât cemût che ca di lôr e esist une sorte di campanilisim jenfri Palermo e Catanie parfin sul mangjâ… fossino dome chescj i problemis ca di noaltris!

ALESSIO POTOCCO