Inte tratorie elegante a doi pas di Place Navone e in chê arude dal borc Centocelle, tra menù cun influencis di nouvelle cousine e bucatini ae amatriciana si respire “Aria di festa”.

Par doi fins di setemane, sîs locâi romans si son trasformâts in ostarie furlane deventant la mete par cerçâ il persut San Denêl. L’ostîr al propon imbinaments, plats realizâts pe ocasion e cercis tra lis taulis, al conte stagjonaduris e carateristichis, al vuide i comensâi ae scuvierte des culinis fofis che a dan origjin a cheste nestre ecelence. Si gjolt la delicatece taiade cul curtìs o cu la storiche taiadore rosse a manuele Berkel.

Fra i clients, Josef, un setantin rafinât e dai mûts zentîi, al sta fer intant che al nase il profum. Al osserve il colôr, dopo al cerce la sô fete di persut a voi sierâts. «Si disfe in bocje cence disfâsi», al dîs cun vôs creançose ancje cuant che al à di intervignî cuant che al viôt la femine impegnade a separâ in maniere chirurgjiche il gras. «Atenzion: chel al à di jessi!». In pension dopo agns di lavôr si insumie di tornâ in Cjargne e si vise cun nostalgjie la zoventût e il so lavôr di militâr.

Marie invezit e domande grissins e une tace di Ribuele Zale: «Cussì mi à insegnât la none che e jere de Basse». Emigrade pe bonifiche intal Agro Pontino «e calcolave il San Denêl il plat des fiestis».

Ricuarts e scuviertis si messedin tra lis taulis. Dopo al cale il cidin. Al è il moment di contâ i segrets par otignî chê dolcece e complessitât aromatiche sutile: «Il microclime particolâr dulà che si cjatin lis bavis des Alps Cjargnelis, il flât salmastri dal Adriatic e l’umit des aghis dal Tiliment», al sclarìs l’espert taiadôr. E cussì lis seradis-event a fasin viazâ il San Denêl cui siei profums, i siei savôrs e la storie dal so teritori dilunc di dute la penisule. Direzion Bari e Matera, dopo Napoli e Catania, par tornâ cu la nêf di Dicembar al Nord, su lis Dolomitis belumatis. ❚

Floriana Bulfon