Par chei che a jentrin tal maraveôs cimitieri dai ebreus di Gurize – di là dal clap, in Slovenie, te zone clamade di Rošna Dolina, ven a stâi la Valade des Rosis – butant il voli di une tombe a di chê altre a cjataran ae fin chê di Carolina Luzzatto Coen, nassude a Triest ai 29 di Novembar dal 1837 e muarte a Gurize ai 24 di Zenâr dal 1919, dopo une vite lungje, intense, passionade, cetant siore di emozions e di bataiis par imponi un spirt creatîf e combatîf che nissun al savarà mai inglovâ o scjafoiâ, nancje cu lis intimidazions o cu la preson.
La sô famee, peade ae tradizion sefardite, chê dai ebreus de Europe Centrâl e Orientâl, si jere inlidrisade intun contest che o podaressin definî di piçule borghesie citadine: insegnants, rivendiui, sensârs. Dignitose, ma cence impuartance ni politiche ni economiche. Jê invezit si jere maridade che no veve nancje finît vincj agns cuntun rapresentant une vore impuartant e in viste de culture ebraiche gurizane, Salomon Girolamo Luzzatto Coen, esponent di une famee cetant lontane par considerazion e par posizion sociâl di chel ambient plui sempliç e cence pretesis de sô origjin triestine. Al baste pensâ che jenfri la parintât dai Luzzatto Coen si podeve ancje contâ, come nevôt, chel Carlo Raimondo Michelstädter che a reson al ven definît ore presint un dai filosofs plui impuartants di chê culture mitteleuropeane che si steve pandint tes capitâls plui grandis dal Imperi asburgjic, tant che Zagabrie, Lubiane, Lublin, Cracovie, Praghe, Viene e ancje Triest e Gurize. In particolâr, propite Carlo Raimondo, preseant la profonditât de anime di cheste zovine agne cuistade, considerantle un spirt interessant e fûr dal ordenari, al tacà a pandi cun jê une amicizie tant grande che esclusive, fate di letaris, frecuentazions, incuintris e dibatits di grande intensitât.
Cussì il piçul tinel di cjase Luzzatto Coen, là che la famee e jere lade a stâ di Triest a Gurize, in vie Rastello, al devente in pôc timp il puest plui ricercjât dai inteletuâi gurizans, scritôrs, poetis e artiscj. Ma ancje gjornaliscj e filosofs, pensadôrs libars e origjinâi che a tacaran a considerâ Carolina un pont di riferiment fondamentâl pe lôr formazion ideâl e spirituâl. Ma ancje jê e rivà a gjoldi di tante sioretât culturâl e di tancj stimui che la compagnie di une clape cussì siore di culture e podè regalâ ae costruzion de sô personalitât, tant di femine che di citadine. In pôcs agns e rive a vuadagnâ une sensibilitât fûr dal comun, deventant une poligrafe sperimentâl, buine di impratichîsi di gjenars diferents di comunicazion: da lis pagjinis dai gjornâi ai copions teatrâi, dai viers poetics ai intervents politics pandûts ancje in public in ocasions uficiâls.
La vite personâl e privade e fo al contrari plene di dolôr e di tragjedie. Tant la fie Ada che il nevôt Carlo si copin finint cul suicidi une esistence disperade e cence confuart di sperance; l’om Girolamo e il fi Graziadio a muerin di malatie un daûr chel altri, lassantle di bessole a proviodi a se stesse e ae piçule fie Cornelia. Probabilmentri cheste situazion dolorose le sburtarà a impegnâsi te leterature pe infanzie, come che e fos une vie par scjamâ la tristerie di une vite che no i veve sparagnât propite nuie. Lis comediis pai fruts, lis golainis di contis, ma ancje la posizion declarade su la cuistion des feminis, e sul rûl impuartant, sedi public sedi culturâl, che a scuegnin vê te societât a son la manifestazion di une voie di riscat e di fiducie te vite.
Convinte de bontât des ideis pedagogjichis di Pestalozzi e di Fröbel, Carolina e proclamave une necessitât di liberâ la culture di chê moralitât rigjide che le sierave intune scjaipule di ipocrisie, pandint la necessitât, al contrari, di favorî lis inclinazions naturâls, lis predisposizions e il caratar dai zovins che si inviavin ae cariere dai studis.
La sô vôs e ven pandude sui gjornâi furlans plui innomenâts dal moment, tant che La Patrie dal Friûl, Pagjinis Furlanis e L’Isonzo.
Carolina e fo tant ative ancje te difese dai dirits civîi: la lote fuarte par une scuele e par une universitât libaris che a garantissin la juste formazion culturâl le meterin in dificoltât devant des autoritâts dal moment. Ancje il fuart sintiment feminist, la lote par une forme di societât plui libare e autodeterminade, la cussience che ipocrisie e politiche dispès a van insiemi, a saran la cause di une schirie di denunziis che a finaran cu la preson tal penitenziari di Göllendorf tal Novembar dal 1915, cuant che Carolina e veve bielzà 78 agns. ❚
Agnul Floramo
