Forsit no ducj a san che si pues «lâ a sagre» (furlane!) ancje a Milan, anzit plui di precîs a Limbiate, a 20 chilometris de capitâl lombarde. Li e je la sede di un dai Fogolârs plui fuarts e atîfs di Italie o adiriture di Europe, il Sot la Nape, che te sô sede di Mombello di Limbiate al organize no une, ma plui fiestis par an.
Lis dôs plui impuartantis a son la “Frascje”, che si fâs cumò a Setembar ai 6, 7 e 8, e la “Viarte”, la ultime setemane di Jugn. In plui, al organize cualchi altre fiestute come chê pai anzians o chê di Sante Luzie pai fruts.
La “Frascje” e vûl ricuardâ la tradizion di organizâ la vendite ocasionâl di vins tes cjasis par disvuedâ lis botis necessariis a acetâ il vin gnûf. Par segnalâ la vendite, come che o savìn, si meteve fûr une frascje.
«Pardabon une sagre furlane – al conte Giovanni Gerussi, president dal 2014 -, cun frico, bacalà cemût che lu fasevin une volte, e ducj i prodots che o fasìn rivâ dal Friûl: ancje lis luianiis e il formadi. Une fieste che e impegne un centenâr di volontaris, par dâ la dimension de robe».
Gerussi al è di Magnan in Riviere e cumò al è in pension dopo une cariere te edilizie tal cjamp sportîf. «O vin contribuît a fâ il tierç anel di San Siro e costruît tancj altris stadis».
Mi conte di parcè che a Limbiate a son cussì tancj furlans, «rivâts par lavorâ pe Snia Viscosa chi dongje a Varedo, o par lâ a vore in fornâs. Tai agns Sessante e coventave int che e ves voie di lavorâ e nus clamavin dal Friûl. Il Fogolâr al è nassût pôc dopo, tal 1972». Une associazion par tignî dongje la int e «nassude par fâ dal ben», mi dîs cun braùre: «Il nestri nol è dome un Fogolâr, ma lu metìn a disposizion par tantis realtâts dal teritori, al à un bar viert ducj i dîs tal dopomisdì, li che si cjate ancje il Messaggero Veneto».
Une realtât vivarose, duncje, ma che si scuintre cui problemis pal futûr: «O vin fat di pôc une conference stampe cuntun apel par coinvolzi i zovins. Chei di cumò no àn plui l’entusiasim che o vevin nô di fâ robis insiemi». Ancje tal coragjo e voie di dâ cheste stiçade si viôt il snait di chest Fogolâr: lungje vite aes sagris furlanis… in Lombardie! ❚
Dree Venier
