«O pues dome contâ la mê piçule storie di frute che, a 10 agns, e je stade obleade a lassâ la sô famee, cul russac su lis spalis cun dute la mê robe dentri, e cun cualchi monede pai bisugns che a podevin presentâsi. O soi stade puartade in cheste cjase e o soi jentrade di chê puarte». Lea Polgar e je ferme sot di un porton di viâl Carso, cuartîr Prati di Rome, a pôcs pas de Rai.
Al numar 46, daûr di chê puarte, e jere la cjase di Aurelio Mistruzzi e de sô femine Melania Yaiteles. A son stâts lôr a salvâle, a acetâ jê e tantis altris fameis ebreis. Dilunc de ocupazion nazifassiste di Rome, parsore de puarte de abitazion dai coniugâts Mistruzzi e jere la steme dal Vatican e sot e ripuartave la didascalie “medaist de Sante Sede”. Chest truc al à consintût no dome di protezi la piçule Lea, ma ancje di produsi cjartis di identitâts falsis pai ebreus che si scuindevin des batudis: a metevin a pericul la proprie vite platant fameis ebreis par salvâlis de furie nazifassiste. «A son stâts coragjôs e afetuôs, come se a fossin stâts nonos. Il mestri al fevelave pôc e cuant che o soi rivade, cence dîmi nuie, mi à fat viodi un sportel. Mi à dit che cuant che al varès fat un segn cul cjâf, jo mi vevi di scuindi li dentri e no varès vût di saltâ fûr fin cuant che no mi vignive a cjoli lui. Par fortune, no je mai stade bisugne di vierzi chel trabuchel», e ricuarde Lea che vuê e à 86 agns.
In Fevrâr, dopo tancj agns, in cheste cjase, parsore di chel porton a àn metude une targhe par ricuardâ un periodi scûr che nol à di jessi dismenteât. Soredut in chest moment che o viodìn fenomens di razisim e di intolerance bande il prossim.
Aurelio Mistruzzi e la sô femine Melania a son stâts di resint ancje nomenâts “Juscj tra lis Nazions” e il lôr non al è stât metût intal Yad Vashem di Jerusalem. Un ricognossiment che al à jemplât di braùre ancje il Friûl. Parcè che Aurelio, scultôr e medaist, al è partît di Vilevuarbe par rivâ a Rome e judâ Lea e tantis altris personis dopo de emanazion des leçs raziâls. Chê targhe e chei nons a son li par visâsi dal sens profont de solidarietât umane. ❚
Floriana Bulfon
