CE FÂ? Ae scuvierte di cjastelîrs e tumbaris

Fin ai 16 di Jugn al è pussibil visitâ a Merêt di Tombe, li de sale BancaTer in place de Vitorie, la mostre archeologjiche “Cjastelîrs, tumbaris, mutaris”. La rispueste plui che positive di presincis e di interès a pet dal patrimoni protostoric che al caraterize il teritori di Merêt di Tombe e il paisaç dal Friûl di mieç cu la presince di tombis a tumul e cjastelîrs, al à convinçût la aministrazion comunâl a sprolungjâ la viertidure de mostre che si insuaze intun progjet plui ampli clamât “Tiere di Cjastelîrs”, finanziât de Regjon e ideât dal Comun di Merêt di Tombe par tutelâ, valorizâ e promovi dut il compendi protostoric formât di 14 comuns che a àn sul propri teritori i rescj di chescj antîcs monuments: un unicum a nivel european. In esposizion e je la ricostruzion in dimensions origjinâls de fuesse sepulcrâl scuvierte intal Lui dal 2008 sot de tumbare di Merêt di Tombe, che e à puartât ae lûs il scheletri di un zovin, dal 1770 prime di Crist, che la sô muse, ricostruide, si pues viodi in mostre. E graciis al ûs de tecnologjie inovative VR (Virtual Reality), al è pussibil meti dai visôrs par amirâ dal alt il cjastelîr di Savalons.
La mostre e je visitabile ogni sabide des 15 aes 18 e la domenie des 9 a misdì. Par visitis vuidadis, scrivi a: cultura@comune.meretoditomba.ud.it  ❚
par cure de redazion