I LIBRIS SIMPRI BOGNS. Lis contis sot spirt dal ostîr di Contecurte

Raffaele Serafini,
Contis sot spirt,
Societât Filologjiche Furlane,
Pasian di Prât, 2017
«Chest nol è un libri. Chest a son doi libris. Se us covente un libri di contis, nome un libri di contis, o vês di lei lis dîs storiis daûr di chestis riis, intituladis cul non dal personaç che lis anime. No podaran plasêus dutis: a son di gjenars leteraris diferents, ancje se il stîl di scrivi al è simpri chel».
Fermìnsi culì, o vin dit ancje masse. Ai letôrs ur consearès di no leile la pagjine cinc, “prime di scomençâ”: e je vonde la citazion chi parsore. Miôr no pierdi lis sorpresis de leture. Par vie che ogni protagonist des dîs storiis al fasarà sunâ un campanel inte memorie di cui che lis lei: ma chest no isal…? Nol fasial vignî iniment chel…? Po ben, sì, al è propit chel. La conferme si le cjate aes pagjinis 141-155. Simpri che un nol si sedi stufât di spietâ e nol si sedi butât a cirî la sô copie di “Friuli uomini e tempi” di pre Josef Marchet o ben il Dizionari biografic dai furlans. E alore sì che si pues lei ancje la pagjine 5 e capî chê facende dal secont libri.
La fantasie, dal sigûr, no i mancje a Serafini. Esemplis: il carabinîr teron che al fevele un furlan culis consonantis doplis; lis verzis bocognis cun dentri orghins umans; il banchîr che al zonte un zero al interès dal 1% e che al à non Zonti Zero e vie indevant.
Ma, in plui de fantasie, daûr di cheste scriture, al è dut un lavoron di documentazion, storiche, gjeografiche, antropologjiche, folcloristiche (sbilfs, guriuts, krampus, aganis, tatzelwurm…), informatiche, zoologjiche, musicâl, economiche e, parfin, filosofiche. No par nuie il libri si pues doprâlu ancje tant che strument di ricercje e test di n… ops, o stavi par pandi il segret dal libri numar doi. Alore o zonti dome che i(l) libri(s) a(l) è (son) ancje un omaç a Federico Tavan, il nestri poete maledet, che la culture furlane no pues dismenteâ mai. E Rafaêl al à ancje une propueste une vore interessante in cheste direzion.
Stramertât il premi San Simon dal 2017 par cheste opare che e vierç tantis stradis e tantis curiositâts. Bon di chel che no i à vignude sù chê di tirâ dentri ancje cualchi contecuntâr! Parcè che Checo Pan, Londar Sberlon, Meni Fari, Lussia no àn nuie a ce fâ cun Contecurte. No mo? ❚
Laurin Zuan Nardin