FONDAZIONE FRIULI. Impegn concret cuintri de puaretât educative dai plui zovins

Un voli atent sui problemis che a interessin i plui zovins in cundizions di dificoltât economiche. La Fondazione Friuli e à simpri vude sensibilitât sul teme e di chest si à fevelât intal incuintri pe presentazion dal bant “Un passo avanti. Idee innovative per il contrasto alla povertà educativa minorile”, che al è stât ai 15 di Novembar te  sale cunvignis de Fondazion, in vie Manin a Udin.
Il Font pal contrast de puaretât educative dai minôrs, che di chel e fâs part ancje la Fondazione Friuli, al è gjestît de imprese sociâl “Con i bambini”: fin cumò al à metût a disposizion dai ents dal tierç setôr, dai sogjets publics e dal mont de scuele, 360 milions di euros in trê agns. Cun chei bêçs a son stâts inviâts i prins cuatri bants, che plui in detai a àn permetût di aprovâ 80 progjets pe prime infanzie, 86 relatîfs ae adolessence e 83 pal cantin “gnovis gjenerazions”. Il cuart bant si clame apont “Un passo avanti. Idee innovative per il contrasto alla povertà educativa minorile”, e si pues discjamâ ae direzion internet http://www.conibambini.org/bando-un-passo-avanti/: cun chest si vûl sostignî i progjets plui inovatîfs, metint a disposizion 70 milions di euros.
Il workshop si è davuelt in vie Manin e al à vût l’obietîf di favorî il trasferiment des cognossincis e di competencis ai progjetiscj des organizazions dal tierç setôr, de scuele e dai ents publics, sburtant  viers il lavôr di laboratori. Ta cheste maniere, si vûl stiçâ il disvilup di ideis e di progjets cul coinvolziment dai educadôrs.
Il “Font pal contrast dei puaretât educative dai minôrs” al diven dal protocol di intese che il President dal Consei dai Ministris al à firmât ai 29 di Avrîl dal 2016 cui ministeris de Economie, dal Lavôr e cu la Associazion des Fondazions di divignince bancjarie (Acri). Il font al à une durade di trê agns cuntune dotazion finanziarie di 120 milions di euros par an. La Acri e à po conferît il rûl di sogjet atuadôr dal font ae Fondazion “Con il sud”, che di bande sô e à metût in pîts une gnove societât sot forme di imprese sociâl partecipade de Fondazion stesse, cun chê di vê une distinzion clare cu lis sôs ativitâts ordenariis e di garantî trasparence e traçabilitât te rindicontazion e tai risultâts. ❚
Piero Cargnelutti