Sfuei Mensîl Furlan Indipendent
Archivi de Patrie

INCHIESTE: JEVE MILITÂR. Di gnûf ducj sul “attenti”?

............

Di Triest a Rome une propueste di leç
par tornâ ae jeve obligatorie

I stituide cul Ream de Italie tal 1861, la jeve militâr e je lade indevant par 144 agns – amade di pôcs, odeade di tancj, sopuartade dai plui – fin che no je stade sospindude di Berlusconi tal 2004 cu la leç Martino, e cul prin di Zenâr dal 2005 no je stade plui. La ultime “classe di ferro” e je stade chê dal 1985. Sospindude e no abolide, trasformade di istitût ordenari a straordenari, di ativâ se a ‘nt fos dibisugne urgjente, e o sperìn di no. Tal so puest, la leç e istituive il servizi volontari di ferme prefissade, vâl a dî il servizi militâr professionâl.

Su chê strade, dal passaç di un esercit di coscrits a un esercit di professioniscj, a son ladis dutis lis grandis potencis e ancje cuasi ducj i Stâts de Europe, cu la ecezion principâl dal esercit di riserviscj de Svuizare, che però al à daûr une struture di fuarcis armadis tra lis plui modernis e miôr furnidis tal mont, e di cualchi Paîs dal nord Europe, dulà che la necessitât di un piçul contingjent anuâl di coscrits, a completâ la struture professionâl dal esercit, e je di norme sodisfate cuasi dal dut di volontaris (viôt l’articul a man drete).

Cumò la Zonte regjonâl a Triest, intune sentade dal Consei dal inizi di Otubar, e à licenziât une propueste di leç statâl pe istituzion di un servizi civîl o militâr obligatori su base regjonâl, “tant che modalitât di difese civîl e militâr dal Stât”, di davuelzi par un periodi di 6 mês te Protezion civîl, tes associazions dal tierç setôr o tal esercit, di bande di zovins e zovinis tra i 18 e 28 agns di etât, citadins talians residents in regjon. La leç, che e je stade inviade al Guvier a Rome pe presentazion aes Cjamaris, e ricalche un dissen di leç ecuivalent fat bon dal Consei regjonâl dal Venit tal mês di Setembar. Ma za tal mês di Fevrâr il segretari de Leghe Matteo Salvini, cumò ministri dal Interni, al veve domandade la reintroduzion di un servizi militâr obligatori par 6 mês, paritari tra oms e feminis, di davuelzi «ognidun sul so teritori (…) garantint nozions di prin socors, protezion civîl, pront intervent, par educâ ae convivence e al rispiet», e la propueste di un servizi civîl o militâr obligatori di 6 mês e jere inseride tal program eletorâl de Leghe aes politichis.

La propueste però no je jentrade tal program di guvier firmât cul M5S, e la stesse ministre de Difese, Elisabetta Trenta dai Cinque Stelle, e à declarât in Avost che la jeve obligatorie e je «une idee romantiche no plui al pas cui timps». Berlusconi ancjemò chest an si jere declarât contrari, come ancje il PD, che al veve inserît invezit tal so program eletorâl la propueste di un servizi civîl obligatori di un mês, «in sinergjie cu la scuele e cul Tierç setôr (…). Un mês di vite al servizi de coletivitât, une esperience pratiche di compagnâ al studi teoric de educazion civiche».

Se la opare di convinciment de Leghe e varà sucès in Parlament, magari in gracie de poie manifestade dai conseîrs regjonâi zimulâts dal Venit e dal Friûl-Vignesie Julie, o starìn a viodi tai mês a vignî.

Intant in Regjon lis oposizions ae Zonte Fedriga a tocjin argoments comuns. Il segretari regjonâl dal PD Salvatore Spitaleri, notant che «si sta consolidant la usance di copiâ ce che a fasin in Venit», al definìs la propueste di une jeve obligatorie «fûr de realtât» fate par «rufianâsi Salvini». Furio Honsell di Open-Sinistra FVG al clame la iniziative «estemporanie e propagandistiche» sotlineant cun stupôr che «e vegni fate vuê propit di un partît tant che la Leghe che dome cualchi an indaûr e sostignive la dissoluzion de unitât nazionâl».

Invezit di une propueste di leç «inaplicabile e copiade mâl dal Venit», Massimo Moretuzzo dal Pat pe Autonomie al invide a «lavorâ in maniere serie ae istituzion di un servizi civîl regjonâl, previodût de leç statâl 64/2001, e mai realizât in Friûl-Vignesie Julie». Moretuzzo al ricuarde in chest sens lis esperiencis des Provinciis autonomis di Trent e Bolzan (viôt l’articul chi in bas), che a àn savût meti in pîts servizis civîi provinciâi che a rispuindin aes necessitâts reâls dal teritori e aes dibisugnis di formazion dai zovins che lu frecuentin.

In chest sens, la leç e je une ocasion pierdude pe Regjon Friûl-Vignesie Julie di meti in cjamp, ancje in chest setôr, la sô specialitât istituzionâl. Pluitost di rispuindi aes dibisugnis di une part politiche extraregjonâl, fasint la part di sempliçs “yes-men” di Vignesie e di Rome, i nestris legjislatôrs a varessin di individuâ percors e soluzions pardabon autonomis, fondadis te nestre particolaritât teritoriâl e culturâl, dant ai nestris zovins, come che al dîs ben Moretuzzo, «la pussibilitât di vivi une esperience di impegn pai altris, di partecipâ a plen te vite sociâl e politiche, e di fâlu tes comunitâts dulà che a vivin». No duncje une pierdite di timp o une punizion, ma un moment di citadinance ative. ❚


Stefania Garlatti-Costa

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +