Fevelant di fumuts par furlan, a volaressin ancje memoreadis lis tantis publicazions che, di un pôcs di agns in ca, a burissin fûr lis scuelis, sicu risultât des ativitâts di lenghe furlane che a vegnin fatis intes classis. Nol è facil vê un cuadri complessîf di chescj libruts, par vie che no dutis lis scuelis a publicizin lis lôr voris. E al va ancje dit che, massime intai prins agns, la cualitât no jere simpri alte (grafie a la buine, fai di stampe e di costrut).
Nol à nissun di chescj difiets chest libri (29 cm par 21), curât di Peressini (un non che aromai al è une sigurece) cu la colaborazion dai fruts de scuele primarie di Sante Marie La Lungje.
La introduzion dal sindic e de assessore a la istruzion, chê des mestris, 13 pagjinis di traduzion par talian des batudis des taulis dissegnadis, i elencs dai fruts, una pagjine di riferiments bibliografichis e dut il rest (plui di 50 pagjinis) al è dissen.
Un lavôr pazient e seguitîf di sgjâf intal passât, inte storie dal paîs e des sôs frazions, une riflession antropologjiche su lis liendis, une leture atente e profondide dal teritori a àn vût tant che risultât une publicazion preseose, dulà che i dissens di Peressini si sposin benon cun chei dai fruts, par tornâ a fâ vivi une liende antighe.
Una maniere inteligjiente par studiâ il passât, par studiâ la lenghe, par capî il puest dulà che si vîf, par imparâ a dissegnâ.
Dal rest il comun di Sante Marie al mastie culture: D’Annunzio, Ungaretti a son passâts par culì e alc a àn lassât. Provait a dâ un voli ator, se o lais intal municipi…
E une altre iniziative e va segnalade: une cjartine dal comun che, di une bande, e je une racuelte di ducj i tiponims e, di chê altre, une vuide detaiade dal teritori cun ducj i servizis, i puescj interessants, lis stradis e v.i. La cjartine si clame Sante Marie La Lungje, tiere di lûs e di maraveis, cun dissens simpri di Peressini e colôrs di Sarolta Szulyovszky.
Cui aial dit che un Comun al vedi dome di fâ marcjepîts?

Laurin Zuan Nardin