Di resint, vincjecuatri gnovis areis a son stadis declaradis risiervis de biosfere MAB Unesco. Tra lis new entry e je la gnove risierve de biosfere dal flum Mura, che al cuvierç un teritori di 29 mil etars dilunc chest cors di aghe. E je la cuarte aree slovene protete a ornâsi dal bol MAB Unesco, dopo des Alps Juliis (aree gjestide dal Parc Nazionâl dal Triglav), jentradis a fâ part de rêt mondiâl intal 2003, dal Cjars (Parc des Škocjanske jame – Grotis di Škocjan), declarât risierve de biosfere intal 2004, e di Kozjansko – Obsotelje (protet dal 2010 e gjestît dal Parc Kozjansko).
Il ministeri dal Ambient sloven al veve mandade indevant za intal 2016 la candidature dal Mura a risierve de biosfere MAB Unesco, candidature sostignude ancje di 13 Comuns traviersâts dal flum. La gnove risierve si slargje suntune aree inte part orientâl de Slovenie, tra il confin austriac e sloven, e chel cravuat e ongjarês. Il flum Mura e il so bacin a svantin une biodiversitât ecezionâl e li si cjate ancje la foreste aluvionâl plui grande de Slovenie, che e fâs par altri part de rêt Natura 2000.
Il ricognossiment Unesco al vierç ancje la strade bande la prime risierve de biosfere MAB Unesco “pentalaterâl” Mura-Drava-Danau, che e colegarès lis areis protetis dilunc di chescj flums in Slovenie, Austrie, Ongjarie, Cravuazie e Serbie, par un totâl di plui di un milion di etars.
Tra lis risiervis de biosfere, in Friûl-Vignesie Julie, intal 2019, ae aree marine protete di Miramare e de cueste triestine al podarès zontâsi il Parc naturâl des Prealps Juliis, che al à presentât in maniere uficiâl la proprie candidature a deventâ risierve MAB Unesco al Ministeri dal ambient ai 10 di Lui. Di Rome a son intenzionâts a sostignî chest an la candidature dal Parc (poiade ancje dai Comuns di Resie, Resiute, Lusevare, Mueç, Scluse, Vençon, Taipane, Dogne, Montenârs, Glemone e Dartigne), che il so ricognossiment al permetarès di vê intun secont moment une aree protete trasfrontaliere des Alps Juliis tra Italie e Slovenie.
Lis risiervis de biosfere MAB Unesco a son conferidis de Unesco intal ambit dal program sientific intergovernatîf Man and the Biosphere, inviât intal 1971, par chei teritoris che a rapresentin esemplis di best practice inte otiche dal disvilup sostignibil e de interazion tra sisteme sociâl e sisteme ecologjic. La rêt MAB Unesco e je formade cumò di 686 risiervis (e di chestis, 20 transfrontalieris) in 122 Paîs diviers. ❚
Tjaša Gruden
