Vie pes ultimis setemanis il Parlament European al à fat sintî la sô vôs. I rapresentants dai citadins de Union Europeane a son stâts protagoniscj, in particolâr, jenfri i 11 e i 12 di Setembar stâts, cuant che si son cjatâts a frontâ cuistions une vore impuartantis pal presint e pal avignî de Union Europeane e plui in gjenerâl de Europe e de sô int e duncje di ducj cuancj nô.
Une prime votazion, une vore spietade, ma salacor ancjemò di plui discutude dentri e soredut fûr de Aule di Strasburc, e je stade chê in cont de Propueste di diretive che e tocje i dirits di autôr inte suaze dal marcjât unic digjitâl. Il test al jere stât sometût ae atenzion dal Parlament European za cualchi mês indaûr, ma al jere stât tornât a mandâ indaûr de bande dai eurodeputâts, che in maiorance i vevin votât cuintri. Par chel a son stadis fatis une schirie di modifichis e la Propueste di diretive e je tornade intal Parlament European ai 12 di Setembar, cuant che je stade fate buine cun 438 vôts a pro, 226 cuintri e 39 astensions.
Cumò il procès legjislatîf al viodarà impegnât il Consei de Union Europeane, là che e larà dilunc la tratative tra i rapresentants dai Stâts. La cuistion e reste ingredeade: al è dificil cjatâ l’ecuilibri jenfri l’obietîf de garanzie dal dirit di autôr, i interès dai gjestôrs des plataformis di internet e dai grups editoriâi plui grancj, lis dibisugnis di autôrs e editôrs indipendents e la libertât di espression e di circolazion di informazions e contignûts.
E je ancjemò plui impuartante la seconde votazion fate dal Parlament European ai 12 di Setembar. In chest câs, cuntune maiorance plui largje (al coventave passâ i doi tierç dai vôts), i eurodeputâts a àn fate buine la relazion prontade de ecologjiste neerlandese Judith Sargentini che e domande la vierzidure cuintri de Ongjarie de procedure sanzionatorie, proviodude dal articul 7 dal Tratât de Union Europeane, daûr de sô riforme fate cul Tratât di Lisbone, pe violazion des normis sul stât di dirit, su la democrazie e sui dirits dal om.
Lis contestazions fatis al guvier ongjarês a son une vore puntuâls e no tocjin dome lis sôs politichis tal cjamp de imigrazion, ma a fasin riferiment a diviersis violazions dai dirits e des libertâts fondamentâls fatis des istituzions di Budapest vie pai ultins agns, massime tal cjamp de informazion e de comunicazion e in chel de justizie e cun riferiment ae situazion des minorancis (in particolâr i rom) e ae coruzion.
Cun 448 vôts a pro, 197 cuintri e 48 astensions, chê dal Parlament European e je une cjolte di posizion autorevule e fuarte in difese dai valôrs e dai principis di fonde de Union Europeane, che e conferme la sô impuartance tant che sogjet rapresentatîf dai citadins e istituzion di garanzie pai dirits des personis e a pro de costruzion de unitât de Europe che e sedi fate cu la int e no cuintri de int.
Juste in cheste suaze a cjatin puest lis iniziativis inmaneadis dai eurodeputâts a pro di dirits linguistics e tutele des minorancis. La plui resinte di chês e je la relazion prontade de galese Jill Evans, fate buine ai 11 di Setembar cun 592 vôts a pro, 45 cuintri e 44 astensions, che e sburte la Union Europeane a meti in vore une politiche a pro des lenghis minorizadis, cun chê di eliminâ i condizionaments e i ostacui pal lôr ûs cu lis tecnologjiis digjitâls e duncj di incressi la lôr presince in chest cjamp. In particolâr si domande ae Union e ai siei Stâts membris di meti adun gnovis politichis par dâur a chês lenghis e a chês comunitâts ducj i imprescj tecnologjics che a coventin e par promovi cussì une concrete paritât.
Se tal câs dal rapuart Sargentini la volontât dal Parlament European e cjatarà su la sô strade lis negoziazions diplomatichis dentri dal Consei, là che il guvier de Polonie al à za palesât la sô intenzion di metisi par tres, cun chê di blocâ dut, lis propuestis fatis indenant de eurodeputade dal Plaid Cymru a varan di jessi cjapadis sù soredut de bande de Comission e dai guviers statâi. Viodarìn ce che al nas. ❚
Marco Stolfo
