Il Consei di Europe al à fate une analisi su la partecipazion feminine ae vite politiche e publiche intai Paîs membris par valutâ cetant che si è ancjemò distants dal obietîf, metût za intal 2003, di une rapresentance feminine almancul dal 40%. Par ce che al tocje la Slovenie, dulà che par altri intal 2002 e je stade adotade la leç di suaze su lis stessis oportunitâts tra om e femine, e po dopo a son stadis definidis dôs risoluzions sul program nazionâl su la stesse oportunitât tra om e femine (2005-2013 e 2015-2020), i dâts - relatîfs al 2016 - a son sodisfasints massime pal Guvier. La metât dai dicasteris (8 su 16) al è vuidât di fat di ministris. Lis parlamentârs a son sù par jù il 37%, di chê altre bande dome il 7,5% dai Comuns al è vuidât di feminis e intal Consei di Stât dome 4 membris su 40 a son feminis. Inte Cort massime, lis judicis a son il 38,7%, intant che ae Cort costituzionâl a son il 55,6%. La percentuâl des ambassadoris e je, invezit, dal 29,5%. Par chel che al inten la rapresentance feminine intal Parlament o podìn zontâ, su la fonde dai dâts publicâts in ocasion dai 25 agns de sô istituzion (fin di Dicembar dal 2017), che la Slovenie e à vût in siet mandâts complessîfs un totâl di 147 seçs ocupâts di feminis (i seçs in Parlament a son 90). Lis parlamentârs a son stadis 105, e di chês 27 a son stadis eletis plui di une volte. La leç eletorâl e facilite la partecipazion feminine previodint intes listis dai candidâts une cuote minime di rapresentance par ogni gjenar dal 35%. Intes elezions europeanis (cumò lis europarlamentârs slovenis a son 3 su 8 elets) e in chês locâls, la cuote previodude par leç e je fissade, invezit, al 40%. A nivel european la Slovenie e je rapresentade ancje de comissarie europeane pai traspuarts Violeta Bulc. In mert aes cjariis plui altis dal Stât, la Slovenie no à mai vût une presidente de Republiche; la prime e uniche prime ministre e je stade Alenka Bratušek, nomenade intal 2013.

Tjaša Gruden