“Sunsûr” al è il titul de cjançon vincidore de Cuarte edizion dal Festival de Cjançon Furlane, cjantade e scrite dal zovin codroipin Jody Bortoluzzi cul jutori di Nicole Lizzi ed Elsa Martin. Un toc cjalt, poetic e ispirât, une poesie in musiche che e à cjatât il favôr dal public e de jurie, cu la presidence dal critic e personaç televisîf Dario Salvatori. La finâl dal concors si è davuelzude ai 6 di Otubar intun Teatri Giovanni da Udine plen, folcjât.
Secont puest a “Il cîl di Alessandrie”, cjantât di Milena Galasso su test di Sandro Gallina e rangjaments di Gabriele Saro. Tierce posizion a “Grispis” di Aldo Giavitto, cjantade di Megan Stefanutti e rangjade di Alessio Domini. Infin, premi de jurie a “Il cûr”, interpretade di Michela Franceschina e scrite insiemi a Nicola Pravisano.
Sedis a son stâts i finaliscj, cetant buine la cualitât des propuestis e la competence dai cjantants. Sul palc, la Orchestre Mitteleuropa direzude di Valter Sivilotti, in alternance di zovins diretôrs, plui une band des sonoritâts eletronichis.
Tra lis peculiaritâts plui interessantis dal concors, al è il fat che in plui de gare vere e proprie, in preparazion di cheste, a son stâts inmaneâts – come ogni an – laboratoris, dulà che i cjantants a fasin pratiche no dome sul mût miôr di cjantâ, studiant la dizion juste e la tecniche vocâl, ma ancje su cemût stâ sul palc, duncje presince seniche e recitazion, indreçâts di Franca Drioli e Walter Mramor. Stesse robe pai rangjadôrs, seguîts di Sivilotti che ancje in chest al è un espert.
Un concors che al è duncje ancje scuele, une academie che e insegne a svilupâ al massim lis potenzialitâts dal furlan inte art musicâl, par une vision atuâl di une lenghe che si dimostre cetant adate, in virtût dal so vocabolari siôr e de largje varietât ritmiche des peraulis – come che al à dit Salvatori a coment de serade finâl -, a vistî lis tindincis de musiche atuâl cun sunôrs plens di significât.
Une lenghe cetant vivarose, zovins artiscj che le doprin dant il massim de lôr creativitât e une scuadre di professionist di nomee internazionâl. Chest al è il Festival de Cjançon Furlane. La prossime edizion e je tal 2019. Di no pierdi! ❚
✒ Alessio Screm
