Il cûr de Europe de diversitât linguistiche e de creativitât al torne pe tierce volte in Friûl, dulà che dut si sta preparant pe tierce edizion di Suns Europe.
Udin al torne duncje a jessi il centri european des varietâts linguistichis e des sôs espressions plui vivarosis tai cjamps de musiche, dal audiovisîf e de leterature, un incuintri e confront tra individuis, grups, lenghis, teritoris e comunitâts, di musiche, di imagjins, di peraulis.
- (Te foto parsore, imagjinis di “Suns”)
Il palc dal festival european des arts performativis tes lenghis minoritariis – organizât di Radio Onde Furlane e Puntozero cul sostegn di Arlef, Regjon F-VJ, Fondazione Friuli, in colaborazion cul Comun di Udin e cul patrocini dal Consei di Europe – al è ancjemò une volte il Teatri Giovanni da Udine.
Suns Europe, cun ducj i siei talents e la creativitât, si impegne a fâ un confront e incuintri tra lenghis antighis e formis di comunicazion modernis e contemporaniis, e al promôf produzions artistichis origjinâls, mostrant cemût che la diversitât linguistiche in Europe, in plui che jessi une ricjece culturâl e je ancje une risorse creative che e ten dongje i popui.
Insiemi ai parons di cjase furlans, a fâ sintî la vôs di Suns a saran ancje grups, regjiscj, scritôrs e atôrs che a rivin di Nord a Sud, di Est a Ovest: dal Paîs Basc, dal Galles, dal Cjanton dai Grisons e de Bretagne, de Galizie, de Basse Sassonie, de Ocitanie e dal Sápmi (regjon plui cognossude tant che Laponie), de Irlande, de Sardegne, e de Buriazie (che si cjate dongje de Mongolie).
Tra i finaliscj che si esibiran a partî des 18 dal Prin di Dicembar, o cjatìn “La Basu”, artist impuartant te suaze dal hip hop basc, il grup “Pres Llareggub” che al sune un groove funk e rap; il nestri Franco Giordani, simpri plui cognossût in regjon pe sô musiche poetiche li che al dopre lis tantis varietâts dal furlan; “Uèi”, cuartet vocâl de Ocitanie cun percussions eletronichis; “Tumasch È”, che dai frêts paisaçs alpins dai Grisons nus puartin cjançons des tonalitâts tropicâls; Isa Zwart, cjantante une vore zovine di folk e pop de Basse Sassonie; “Tiny Feet”, cjantautôrs indie rock; il grup “Esposa” cul lôr elettro pop e rock & roll de Galizie e tancj altris.
Il program si inricjìs di proiezions cinematografichis, happy hour di events come chel sul Premi San Simon, in program simpri ai Prin di Dicembar, dulà che la jurie e presentarà i vincidôrs dal premi di leterature furlane e cine, il Talk show «I Love EU» cun Gruff Rhys, Maurizio Mattiuzza, Onno Falkena, Ariel Yerushalmi e «Scuele Europe», un incuintri tra i artiscj e i arlêfs des scuelis di Udin.
Fin a metât Novembar, i students universitaris ma ancje ducj chei che, pûr cognossint l’inglês, a volessin deventâ part de famee di Suns, a puedin compilâ la domande di iscrizion che si discjame sul sît de manifestazion, inviant il modul ae mail: volontari@sunseurope.com
Il program in detai si cjate in rêt sul sît www.sunseurope.com e su la Pagjine Facebook, che tes zornadis dal festival e sarà simpri inzornade cun imagjins e video in direte. ❚
✒ Moira Pezzetta
