A svicinâ l’album ae orele, si pues sinti a sdrondenâ, vibrâ e cori il flum che ducj i furlans, des monts aes vals, a cognossin ben: il Tiliment. Ricuarts e notis acompagnadis di un clap a componin la custodie dal gnûf album di Cristiano Deison e Andrea Gastaldello, in art Deison & Mingle, compositôrs di musiche eletroniche, sperimentâl.
Tiliaventum, produsût sot de etichete Loud! e Final Muzik e publicât a Lui, al è un dialic tra i artiscj e il Tiliment, metût dongje intun album fat di undis tocs musicâi, fotografiis, imagjins e dissens realizâts di Giulia Spanghero, poesiis e tescj componûts de ideadore dal progjet Sandra Tonizzo.
La conte dal Tiliment e je la conte che e torne a percori agnorums, cambiaments plui o mancul imburîts. Su la fonde di chest e je ancje la sielte di vê dât il titul di Tiliaventum, come che al vignive clamât in origjin par latin. Cussì a son ancje il sun e lis notis che a slusin jenfri lis fressuris dal piçul clap che si cjate dentri te custodie. Un album che al conte storiis di altris timps, di altris vitis.
I doi artiscj a omazin, midiant de tastiere di Mingle e dai nastris manipolâts di Deison, un flum simpri in mude. Il flum al è duncje la forme simboliche di un passaç dal timp e dal spazi, un percors emozionâl dulà che si cjatin vitis e storiis, come che a son i ramaçs che si incrosin sul so jet.
Propit par rapresentâ cheste metafore, de incrosadure di vitis e storiis, a son intervignûts tancj artiscj e amîs. Come che si lei tes notis de custodie, o cjatìn un pugn di grave di Tony Longheu e Lorelei Facile, colps e bati di Matteo Dainese, ondis di là dal flum cun All My Faith Lost, une grampe di claps di Alberto Novellom, ramaçs e fueam di Maba, eletroniche pantanose di The Haunting Green, lis cuardis vocâi di Anna Comand e il pletri, claps e cuardis stuartis di Miss XoX.
Insiemi, ducj chescj artiscj a proponin un viaç psico gjeografic cun moments intims e malinconics. A partî dal prin toc, Arteria, dulà che si sintin i suns a cori come intun flus dal flum, tantis voltis rot di notis plui profondis. Tiliment al ripuarte invezit suns plui lizêrs, fasint cressi i moviments soteranis.
Agane al trasmet emozions svoladiis che a van a colmâsi cu lis notis torenziâls di La Piena. Sotterraneo, al zuie su notis plui trancuilis e intimis che però a van a finî cun Grave, deventant eletrichis e metalichis.
Pietra Viva al è il toc dulà che di plui si sint la cressite sonore, che e va a finî cu lis musichis “metal” di 21.00.12: une cjançon fuarte che nus fâs imagjinâ tocs di refudums che a ricuardin i segns dal timp passat, cusì come testemoneancis lassadis dal Taramot aes 21.00.12 dai 6 di Mai dal ’76.
Savalon nus torne a puartâ te trancuilitât, fin a rivâ a Nel Tuo Letto che nus fâs imagjinâ la lûs che e filtre tra i ramaçs, prin che il viaç al finissi cun Ajar e Aghe, toc delicât in stîl “ambient folk”, e l’unic cjantât de vôs di Anna Comand.
Par comprâ l’album e vê in cjase un toc di Tiliment e i ricuarts indelebii che nus lasse, lait a butâ un voli al sît www.deison.net/tiliaventum.html ❚
✒ Moira Pezzetta
