Un viaç ator e insot de scriture, de poesie e dal pinsîr di Pier Paolo Pasolini, dal so rapuart cul Friûl e cul mont, tra lûcs reâi e utopiis salacor ancjemò plui concretis. Si pues piturâ cun chestis peraulis la racuelte di saçs metude adun di Angela Felice, studiose di leterature e di teatri e diretore dal Teatro Club di Udin e – no par câs – dal Centri studis Pasolini di Cjasarse.
Il libri, biel di viodi e plasevul di lei, al sgarfe tes peraulis dal inteletuâl eretic e soredut tai lûcs de sô formazion leterarie, chel Friûl dai agns Cuarante dal secul stât che al sa di tiere e di aghe, di rogans e di primulis, di siums e di visions, e al fâs indenant sugjeriments di leture e di riflession, là che si incrosin paisaçs e ideis, gjeografiis e vite, incjant e disincjant.
Marco Stolfo
Angela Felice, ‘L’utopia di Pasolini’, Bottega Errante, 2017.
