Il cîl l’è scûr,
Al plûf a planc…
Son come lagrimis
Che a vegnin da lontan.
L’anime e cîr
Fra il lusi da lis fueis
Un blecut di celest,
Ma l’è di bant
Che il cîl l’è scûr
E al plûf a planc.

Pieri Someda De Marco (1891-1970).
Nassût a Merêt di Tombe, al à fat il nodâr a Udin. In plui di publicâ studis su la storie e l’ art in Friûl, al scrivè ancje in marilenghe, in prose (massime pal teatri) e in poesie. Lis sôs racueltis a son: Il miò zardin (1943), Il cocolâr (1943), Poesiis (1952) e infin Su l’ale dal timp (1969). Al à contribuît al rinovament de poesie par furlan, parie cun chei dal grop Risultive, bandonant la metriche tradizionâl, e doprant il viers libar.

par cure di Laurin Zuan Nardin