SIMPRI BOGNS. Gina Marpillero, “Mê mari ‘a diseve”, Pordenon, 2000

“Din don campanon / tre pulgetes sul balcon / une ‘a file, une ‘a daspe / une ‘a fâs pipins di paste / la plui vecje ‘a pree San Vît / par ch’a j cjati un bon marît / balc e ros e colorît / come il lat, come il vin / come la flôr dal rosmarin”
Le cjatìn in cuarte di cuviertine cheste filastrocje che ducj plui o mancul o cognossin di fruts insù, magari cun cualchi variante. E cun di fat, un dai plasês di chest libri al pues jessi chel di confrontâ la version che o sin daûr a lei cun chê che o vin intai nestris ricuarts. Mûts di dî nassûts de savietât popolâr che a tratin di diviers aspiets dal vivi cuotidian: l’amôr, il matrimoni, il lavôr, la economie, la fortune e la disfortune, la bielece, la salût, lis cualitâts, i difiets, i puartaments, il mangjâ, il timp e v.i. E po une schirie di induvinei, scherçs e nainis. E par finî, nûf storiis e storiutis tramandadis des tradizions de Cjargne (la autore e jere di Darte).
Cent e cincuante pagjinis (insioradis des ilustrazions dal artist Bianzan) che nus disin ancje di plui di chel che a disin: par esempli la storie dal cjalçon tant grues che al strope il Cjarsò e da il dret par une biele recipe par fâ i cjalçons sicu Diu al comande. Chê dal Saragnò prezious nus conte de famee dai Gortans e de lôr passion pal teritori: a van a cirî claps ‘storics’ ator pal Saragnò (la val dal Incjaroi), ma une femenute une vore sveade e mande a patràs lis lôr scuviertis. Il marît che al è lât in France a comprâ une belance al è in realtât un emigrant; tô mari a mulin, to pari a seâ al è un riferiment ae dure vite contadine; Diu da Riu, Crist da Tamau e Madone dal Cau nus fas pensâ al santuari di Maria Luggau in Austrie, destinazion di pelegrinaç tradizionâl. Il pulç e la pulce e la tiritere dal Siôr Simon si puedin leilis sicu variantis de flabe dal tornâ eterni, vâl a dî di un fat che al prodûs un altri fat e po un altri e po ancjemò un e vie dilunc.
Come che e dîs la Marpillero (1912-2008) inte jentrade “‘a covente scrivi, ‘a covente cjacarâ,’a covente cjantâ, ‘a covente doprâ proverbios e mûz di dî, ‘a covente lassâ scrit encje ‘me mari ‘a diseve'”.
Se il fin de racuelte al jere chest, al è sigûr che al è rivât.
✒ Laurin Zuan Nardin