Sfuei Mensîl Furlan Indipendent
Archivi de Patrie

Parcè che “ce che o volìn” al è ancjemò atuâl

Gianfranco D’Aronco

LIS RESONS STORICHIS DES ISTANCIS FURLANISTIS
I furlaniscj a son partîts tal 1945 cun ideis une vore claris, e si son daurman inschiriâts cun Tiziano Tessitori. La Italie e veve di dâsi une gnove costituzion, che e previodeve la autonomie des regjons. Tessitori al rivendicà il dirit dal Friûl a jessi une di chestis regjons. Stant che la Associazion pe autonomie, che lui al veve fondade tal mês di Lui, e veve slizeride la sô azion, tal Zenâr dal 1947 o fondarin il Moviment popolâr furlan. Ma la nestre idee e veve lidrîs profondis, e il model dal patriote talian dal ‘800 al jere par nô Carlo Cattaneo, lombart, che al voleve une Italie federaliste: tesi invalidade dal centralisim savoiart. Culì di nô al jere Pacifico Valussi, che al sossolave la idee di un Friûl tant che regjon “naturâl”, distinte di chês dongje. Po dopo al rivà Achille Tellini, teoric de “Patrie ladine”. Tornant ae costituzion, cualchidun culì di nô (!) al brigà tant che la Assemblee costituente e stabilì che il Friûl, aromai ricognossût regjon cun autonomie particolâr, si governàs “in maniere provisorie” cun autonomie normâl. Ma daspò si metè in frigorifar ancje cheste soluzion fintremai al 1964, cuant che i gnespui triestins a forin madûrs: cussì il Friûl al fo metût a metadie. Nons e cognons tal gno libri su la nestre regjon “mai nassude”.
DASPÒ DE VUERE_Tai agns de ricostruzion dopo des feridis de vuere, il Friûl al cerçà lis deliziis de dipendence di Vignesie, che nus tratà piês di une cualsisedi provincie dal Venit. I anti regjonaliscj a vaìrin lagrimis di crocodîl, dismenteant che a jerin propit lôr i miôrs aleâts dal centralisim. Nus vevin gjavade la autonomie speciâl, ma di speciâl a restarin a dilunc lis servitûts militârs. No si podeve tocjâ une fuee cence il permès dai gjenerâi. Mi visi che un an o rivai a Rome, e o lei a cjatâ al ministeri Guglielmo Pelizzo, sotsegretari ae difese. “A comandin lôr”, mi disè.
LA SFIDE DAL TARAMOT_Il taramot dal 1976 al è la miôr dimostrazion che, se nus lassin fâ in autonomie, si messedìn ben e dal moment. E cun onestât. I confronts cu la Irpinie a fevelin clâr. Cui che al à vuadagnât di plui dal taramot e je stade però Triest, che no jere taramotade. Triest, par che il Friûl al podès vê il so tacant de universitât, e concepì une specie di “do ut des” (o jeri par dî un ricat), e e otignì Areis sientifichis, Centris di fisiche teoriche, Scuelis di studis avanzâts, Istitût di fisiche nucleâr, Sincrotron, e v.i.
CUINTRI LA NIVELE DE GLOBALIZAZION_I contraris ae globalizazion a àn vût la disgracie (7 agns fa a Gjenue) di viodi a cjapâ possès de lôr juste bataie grups di sbrenâts, piturâts di ros o di neri, che a comprometerin une azion pacifiche che altris a vevin puartât indenant in maniere legjitime. Par chel, la globalizazion e vuadagnà. Cumò, se no cambie la musiche, o sin plui o mancul ducj destinâts al stamp che, tant che e scriveve Enrica Cragnolini, “dut al nivele”. Par fortune, in cjamp internazionâl a son mestris tant che Serge Latouche, che a sburtin il mont a vierzi i voi e a rivalutâ lis energjiis locâls. O sin cuintri la globalizazion, sintetizade des grandis infrastruturis che a viodaressin i convois fâ gare di Barcelone a Kiev e di Kiev a Barcelone, naturalmentri vie Triest. (Al ven di pensâ ae “ammoina”, za in ûs te marine borboniche, che, a un comant specific, cui che al jere sul puint al veve di cori inte stive, e cui che al jere inte stive al veve di cori sul puint, e cui che al jere a pope al veve di cori a prore e cussì al contrari: ducj in chel istès timp). Il traspuart al vignarès a costâ plui de marcjanzie.
IL GNÛF PRESIDENT DE REGJON_Renzo Tondo al è un om prudent. La leç sul insegnament dal furlan salacor e vignarà ritocjade, di mût che al resti dut tant che prime.
BRAURÔS DI JESSI FURLANS_O vin di sei gjenerôs cun ducj i forescj, ma i forescj onescj. E no podìn, cun chê di rispietâ il bon acet, lassâsi meti i pîts sul cjâf. No disino nuie lis cronachis dai delits cuotidians, che pal plui a àn tant che responsabil int che e ven dal sud o dal est? In provincie di Udin, su 424 di lôr che a son lâts a finîle in preson tal 2007, dome 82 a jerin talians. Varessino di cjaminâ tes nestris citâts e tai nestris paîs cjalantsi simpri lis spalis?
Une robe sole mi auguri: che in Consei regjonâl i furlans, che a son la maiorance, a lassin pierdi il complès di inferioritât e che invezit a imparin dal lôr vicins di banc, che a san ben sedi domandâ che otignî.

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +