SAPPADA 1894

Tal mês di Avrîl dal an passât a Gardiscje al anunzi i jere stât dât acet cuntun grant bati di mans: la Fieste de Patrie dal Friûl dal 2017, a distance di 940 agns de fondazion dal Stât patriarcjâl, e à di jessi celebrade a Sapade/Plodn. La sperance chê volte e jere chê di podê festezâ finalmentri il tornâ in Friûl dal comun dal Cjadovri, che al sta spietant dal 2008 che il Parlament al fasi bon il passaç di Regjon daûr de volontât dai citadins sapadins che si son esprimûts cul referendum. Propit dodis mês fa, dì sù dì jù, il Senât al veve tradît ancjemò une volte lis spietis di dute la comunitât. Dopo jessi rivâts adore a fâ passâ la leç pal passaç di regjon tes dôs comissions di Palaç Madama (Belanç e Afârs Costituzionâi), sul plui biel, cuant che si doveve calendarizâ la discussion in aule, une part di senatôrs dal Partît Democratic, cul benstâ dal Guvier, a àn decidût di tirâ a dilunc il dut, cjapant timp, tirant fûr gnovis scusis e discjadenant la rabie de popolazion, dai aministradôrs e dai politics locâi. Di chê volte, no si à savût plui nuie.

Cumò, che si svicine l’apontament dai 3 di Avrîl, in gracie di cheste Fieste l’auspici di ducj i furlans e soredut dai sapadins, al è naturalmentri chel di tornâ a scjassâ l’arbul de politiche romane, simpri plui ingredeade. Lu spere ancje il sindic di Plodn, Manuel Piller Hoffer che, preseant il sostegn dal Friûl a cheste bataie, al è strac di continuâ a fâ vivi tal limbo il propri comun, che di une bande al varès bisugne dal supuart furlan pal sostegn dal sisteme turistic locâl, e di chê altre si scuintre cuntune regjon Venit che e à pensât di dâ une man dome a chei paîs di confin cul Trentin e il Sudtirôl.

No stin a dismenteâsi che pal so significât, il 3 di Avrîl al rapresente dut câs un moment impuartant pe comunitât furlane, une vere fieste par memoreâ e par tornâ a pensâ in clâf moderne aes formis di autoguvier e di rapresentativitât che, par tancj agns, a àn caraterizade la Patrie dal Friûl. E alore, ai 3 di Avrîl ducj a Sapade.❚

✒ David Zanirato