Ai 24 di Novembar
Sant Crisogun, vescul e martar
Memorie
Crisogun al è ricuardât tant che martar intal Martirologji jeronimian e tant che vescul inte liste dai vescui di Aquilee. La passion di sante Anastasie (secul V) e riferìs che Crisogun, par ordin di Dioclezian, al è stât menât «ad Aquas Gradatas» e li decapitât. Cun dute probabilitât il martar al è stât sepulît li, come che nus conferme la iscrizion «Beatissimo martyri Chrysogono» cjatade intun sarcofac dal cuart secul te localitât clamade «Sant Canzian». A Rome e je une glesie une vore antighe dedicade a Crisogun e il so non al è ripuartât ancje intal Cjanul roman. Chest al à fat in mût che la sô venerazion si slargjàs di plui. Si cjate une imagjin di chest martar ancje intun mosaic di Ravene dal sec. VI. ❚

Test gjavât fûr dal Messâl par furlan, di agns in spiete de aprovazion di bande de CEI (Conference Episcopâl Taliane).