ZODIAC FURLAN. Sagjitari

SAGJITARI
Nassûts jenfri i 23 di Novembar e i 21 di Dicembar
Segn di tiere (al à bielzà cuatri çatis e doi braçs, no volarês mighe tacâi ancje lis alis o lis pinis?)
Sport preferît: Sapâ l’ort
Il Sagjitari, normalmentri, al è rafigurât tant che un centauri, creature mitologjiche, mieze om e mieze cjaval, cuntun arc par tirâ lis frecis. La tradizion furlane lu rapresente invezit cualchi volte come mieç om e mieze vacje (cuntun podin pal lat tal puest dal arc), cualchi volte come mieç om e mieç purcit (secont des imagjins cjatadis des bandis di Sant Denêl). La version plui difondude, però, e je chê cun mieç om e mieç bo. Naturalmentri cence arc o frecis, dome cu la vuarzine.
Duncje, il Sagjitari furlan al met dongje dutis lis carateristichis dal furlan (gran lavoradôr, cul cjâf cuadrât) e chês dal bo (gran lavoradôr, cul cjâf cuadrât): o podês stâ sigûrs che no si stracarà mai di tirâ la vuarzine. Dut câs, il Sagjitari al une persone cui pîts (o cu lis çatis?) plantâts par tiere, tant che par jessi sigûrs, di pîts a ‘nd à cuatri.
Dome fevelant di mangjâ al ven cualchi dubi: al Sagjitari i plasarano polente, frico, broade e muset come al om, o stran e jerbe come al bo? Par fortune, la metât cu la bocje e je chê umane, cussì il Sagjitari al pues tornâ a cjapâ lis fuarcis dopo une dì di lavôr parant jù alc di sest.
Metint insiemi il cjâf di om (furlan) e la fuarce dal bo, il Sagjitari al pues fâ dut di bessôl. Duncje, e je une persone indipendente, che e à miôr judâ che jessi judade (va ben, lu sai: par jessi cussì no covente jessi mieç bo, baste jessi un furlan intîr).
Il caratar dal Sagjitari furlan al pues jessi confondût cun chel de Belance furlane, dal Leon furlan o ancje dal Taur furlan. Tant, lu savìn ducj: l’oroscop al è dute une monade.
Salût: Miôr vê mâl di cjâf che mâl di gjambis, soredut cuant che di gjambis a ‘nd è cuatri.
Amôr: La vuestre metât disot e varâ un grum di sucès cu lis vacjis. Viodêt di fâlis lâ ben ancje ae metât parsore. ❚
Bete di Spere